MPCC chuan CM leh Minister thenkhatte Budget chungchang dikhlel deuha sawi thin ah an puh

 

MPCC Media Department chuan CAG report behchhanin ZPM sum puk dan chungchang an sawi a, ZPM sorkar chu tun ang zela sum an puk chuan kum 40 lo sawrkar tawh ten kum 40 chhunga an bat aiin ZPM sawrkar in kum 5 chhunga an puk a tam thei dawn a ni an ti.

 

Chief Minister leh Minister thenkhatten tunhnaiah Budget chungchang dikhlel deuhin an sawi thin ni-a sawiin, Finance Department in RTI zawhna an chhannaah ZPM chuan sawrkarna an chelh tan kum 2023 December atanga kumin June thleng khan cheng Vaibelchhe 6214.27 an puk tawh a, kum khatah cheng vaibelchhe sangthum chuang an puk tihna a ni tih sawiin, hei hian ZPM sawrkar hnua leibat zat cheng vaibelchhe 500 ti a an sawi thin chu thudiklo chiang tak a ni tih a lantir an ti a ni.

 

CAG in Mizoram sawrkar sum dinhmun, unaudited provisional figure thla tin a tarlan thinah kum 2024-2025 chhung khan cheng vaibelchhe 3133.45 lai an puk a, Budget a puk an tum cheng vaibelchhe 1365.70 aia an puk tamna chu zaa 229.44 lai a tling an ti a. ZPM sawrkar in kum 5 chhunga an puk a tam thei dawn tih sawiin, ZPM kaihhruai sorkarin leiba an rulh zel avanga leibat tlem hle anga an sawi thin chu chhut chian a ngai hle an ti bawk.

Hei bakah hian Chief Minister-in Independence Day-a a thusawi ama ziah ngei a ni tih a sawi chu tha lo an tih thu sawiin, Sawrkar hmalakna leh hmachhawp te Department hrang hrang hotuten an lakkhawm chu Chief Minister-in a chhiarchhuak thin a, an duh angin an ziak ngai lova, politics a hlawkpui phei chu an tum ngai lo an ti a, ZPM kaihhruai sorkar chu Protocol nei lo ang maia kalin, Concern Minister te lo sawi khalh leh lo sawi sak ching Minister leh MLA te an awm bawk a, kalphung thar chu a mumal lo an tih thu an sawi a ni.