P&E Department ten Smart Meter Vuah kalpui tan

Power & Electricity Department Mizoram chuan thuchhuah siamin, Electric Energy Meter hmanlai mek chu Pre-paid leh Post paid atana hmankawp theih Smart Meter-a thlak vek tur a nih angin hmalakna kalpui tan mek a nih thu an thuchhuah chuan a tarlang.
He Smart meter vuah/thlak hna hi Aizawl ah kalpui tan niin, Satnam Global Infra Project Ltd. ten thawk mekin, Meter thlak tura te hian ID an nei ngei tur a ni a, ID Card neilo thlak tum an awm chuan P&E Department Office ah hriattir vat turin mipuite an ngen a ni.
Smart meter thlak man hi mipuiten a man pek a ngaihloh thu sawiin, meter thlakman dil an awm chuan Department ah hrilh hre vat turin mipuite an ngen a, Meter thlaktute hian meter thlak chiah an hna a nih avangin wiring an khawih danglam ve ngawt theihloh thu Department thuchhuah chuan a tarlang a ni.
Meter thlak hna hi tluang taka a kal theih nan mipuite an Consumer Number leh Consumer hming dik taka lo chhinchhiah turin an ngen a, Meter hi sang lutuk lo mit zawn vela lo vuah tir hram turin mipuite an thuchhuah chuan a ngen bawk a ni.