ZOEN 11th August 2025 : Lunglei District Congress Committee (LDCC) leh Lunglei District Youth Congress Committee (LDYCC) hruaitute chuan vawiin chawhnu khan Bualte leh Thualṭhu inkara leimin a hmunah an tlawh. Congress hruaitute hi Bualte khawtlang VCP Pu K. Malsawmkima hovin YMA hruaitute nen an lo dawngsawng a, Bualte YMA Information Office ah inkawm hona an neih bakah a hmunah leimin an en ho.
He hunah hian LDCC President Pu R. Lalnunthara chuan thu tawi sawiin Bualte khawtlang chu khawtlang entawn tlak tak an nih thu leh hetiang hun harsat lai a khualzin tangkhang ṭhahnem tak an lo dawngsawng ṭhin chu a lawmawm a tiin khawtlang leh Kohhran lam in phal taka an hmunhma te khualzin tangkhang te ei leh in buatsaihna atana an hman tir chu a lawmawm a tih thu a sawi. Pu Mathara chuan Congress party chu helai hmunah hian hmingthat leh engemaw boruak siam tuma lokal kan ni lova. Bualte khawtlangin intawrhna te leh ṭanpui ngaite ṭanpuina kawnga in inpekna te kan hriatpuina leh kan theihtawp kan chhuah pui che u a ni tih lannan kan rawn tlawh che u a ni a ti.
LDCC Treasurer Pu Eric R. Zomuanpuia pawh in thu sawiin Mizovin dam leh tlangkhatah thih leh ruam khatah an tih ṭhin chu vawiin ah hian Bualte khawtlang chuan a takin an lantir a, ṭanpui ngaite ṭanpui tura a thim a var pawh thlu lova khawtlang inpekna chu fakawm a tih thu a sawi.
LDYCC President Pu Moses Lalrinchhana Chinzah pawh in thusawiin “Bualte leh Thualṭhu khawtlang chu hun harsa tak khualzin veivak ten an tawn laia nu leh pa chan chang a theihtawp chhuah a, khualzin tangkhang ten harsatna tawk miah lova chhawmdawl ngai an lo chhawmdawl chu alawmawm a tih thu a sawi a. Khaw pahnih inkara leimin avanga harsatna kan tawh na hian Mizote kan inlungrual zia leh ṭanpui ngaite ṭanpui tlat ṭhin tu kan nih zia Bualte leh Thualṭhu khawtlang kaltlang hian Mizoram in kannhmu leh mek a ni” a ti.
LDCC leh LDYCC hruaitute hian Bualte leh Thualṭhu khawtlang ten a ṭul apianga an hman atan YMA kaltlangin ₹5000/- ve ve an hlan a ni.
♥️