ZPM Coordination Committee chuan thuchhuah siamin Nimin Dt 18 September 2025 ZPM Coordination Committee thukhawm chuan CSS Employess chungchang a thlir thu tarlangin , CSS Regularization Scheme Sawrkar hmasa (MNF) in a lo duan chu tihdanglam lova hman a nih avangin a khirh deuh niin meeting chuan an hriat thu a tarlang bawk. CSS Employees Regularization Scheme hi Dan in a phal chin ah awlsam deuh zawka siam that leh nise an tih thu ZPM Coordination Committee thuchhuah chuan a tarlang a ni.
ZPM Coordination Committee chuan CSS Employees te mipui harsatna siam tawh lova hna ngai chhunzawm tawh turin an ngen thu an thuchhuah hian a tarlang bawk a ni.
Hetihlai hian CSS hnuaia thawk intelkhawm All Mizoram CSS Employees Coordination Committee, AMCECC chu an thil ngiat nawr nan tiamchin awm lova an chawlh zui avangin zirna in leh damdawi lama inenkawlna hmun te a nghawng tawh hle a.
Mizoram SSA Teacher Association (MSSTA) President Rokima Varte chuan CSS hnuaia zirtirtu hlang thawhna school te chu a inkhar vek a, sorkarin school hawng turin ti mahse zirna an kalpui chuang lo a ti a, CSS zirtirtu tam zawk thawhna schoolah te pawh school hawng mah se zirna pangngai a kal thei lova, zirlaite chu hnathawh leh sikul tihfai tir an ni a ti a, sorkar chuan CSS zirtirtute an nawrh avangin school khar a awm lo tih sawi mah se zirna a kal loh avangin nu leh pa tam takin an fate school an kal tir lo tih thu an dawng niin a sawi bawk.
NHM President Pu Rammawia pawhin tun hmaa Sub Centre ti-a hriat thin Health & Wellness Centre te chu District hrang hrangah khar an ni a, a nghet thawhna inhawng awmchhun te pawh hna an thawk hlei thei lo a ti a, Community Health Centres (CHC), leh Urban Primary Health Centres (UPHC) te pawh a inkhar deuh vek a, a inhawng te pawh ZMC atanga intern doctor ten an inzirna atana an hawn a ni a ti a, District Hospital-a lab technician leh X-ray technician tiamin thawktu hrang hrangte chu CSS hnuaia thawkte an nih avangin hna an thawk mumal thei lova, a inhawng te pawh an kal thei hram hram niin a sawi a, Civil Hospital, Aizawlah pawh nurse 65 leh thawktu dang tiamin CSS hnuaia thawk mi 160 vel an awm a, an chawlh vek avang hian damdawi in hnathawh lam a nghawng hle a ti a, physiotherapist te pawh CSS hnuai an nih avangin Civil Hospital-a Mizoram Larsap nupuiin physio therapy tih a tum pawh a hlawhchham tih a sawi a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni