ZOEN 26th Sept. 2025 : State Tax Department hnuaia Quick Response Team chuan Mizorama dawr hrang hranga GST rate thar hmang lo mi 10 chuang manin a hrem nan pawisa an chawi tir.
State Tax Commissioner Pu HK Lalhawngliana chuan Quick Response Team dinin GST rate tih hniam hnua sumdawng an thil zawrh la ti hniam ve lo mi 10 chuang an man tawh a, heng mite hrem nan pawisa an chawi tir nghal zel tih sawiin, nitin complain a la lut reng a, theih ang angin Quick Response Team ten an bawhzui nghal zel a, GST registration nei dawr te an thlurbing phawt a, GST registration nei lo mipui nghawng sumdawng lian dangte pawh an thur chhuak leh tan mek tih sawiin heng mite hi GST registration ti turin an nawr a, an ti duh lo a nih pawn Suo moto hmangin registration an tih tir a, tun dinhmunah Mizoram pumah GST registration nei sumdawng 9000 atang sing 1 vel bawr an awm tih a sawi bawk a ni.
Pu Lalrothanga Dy Commissioner of Taxes Lunglei Zone chuan GST 2.0 kalpui turah GST registration drive nasatakin an kalpui dawn tih sawiin GST ti thei reng, ti duhlo te nasatakin an vai dawn a ti.
Dy Commissioner of Taxes Lunglei Zone chuan Dawr lian kan tih ho zingah engemawzah GST ti lo an awm tih sawiin dan anga Registration an ti lo anih chuan a tlem berah Rs 10,000 an chawi a ngai dawn a, amaherawhchu in nawr ngai leh inhrem kher ngai lovin ti se tih chu an duhdan a ni a ti. Miin GST a neih chuan a bungrua lakna kha lo to pawh nise ITC a claim thei a, hei vang hian 22nd Sept 2025 atang khan Tax lakna tur a tihhniam Items ah chuan dawrkai ten an thil zawrh an ti hniam tur a ni, an tan chawibelhna tur a awm lo a ti. Chawi belh tur a inngai an awm anih chuan GST registration an tih loh vang a ni mai a ti
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
ZPM Coordination Committee in CSS chungchang thuchhuah siam