Lunglei Additional Deputy Commissioner hovin I-Day hman dan tur thlirho

ZOEN 11th August 2025 : Vawiin khan Lunglei DC Conference Hall-ah Lunglei District Additional Deputy Commissioner Pi Rochuangkimi Khenglawt hovin Lungleia Independence Day 2025 atana inbuatsaihna kal mek thlir ho a ni a. Sawrkar official-te, zirna in, pawl hrang hrang leh kohhran ai awhte an tel.

Pu K. Beihmotaosa Additional S.P chuan Independence Day ceremonial parade atana inbuatsaihna kalpui dan tar langin, ceremonial parade-ah hian armed contingent 4, unarmed contingent 9, school contingent 11 leh pipe band 3, a vaiin contingent 27 awm thei tura beisei a nih thu a sawi. Lunglei Municipal Council (LMC) Secretary Pi Zoramdini’n mual leh a vel tihfai kawngah LMC leh Scouts & Guides ṭang kawpa hma lak tum a nih thu a tar lang a. Inbuatsaihna hrang hrang pawh tluang taka kalpui a nih thu tar lan a ni bawk.

Vawiin ṭhutkhawmah hian Independence Day puala in tina ram puanzar (national flag) zar tura hma lakna, “Har Ghar Tiranga” kalpui leh tura ruahmanna pawh sawi ho a ni a. August ni 13, 2025-ah ram puanzar nena kawng zawh, ‘Tiranga Rally’ chu sikul naupangte nen buatsaih tur niin, Lunglei, Lungsen, Tlabung leh Bunghmun khaw chhung hmun langsar laiah India ram puanzar leh a kaihhnawih thuziak leh lemziak chi hrang hrang tar a ni anga, sikul thlan bik 4 – primary, middle, high & higher secondary school pakhat ṭheuhvah sikul bang leh a chhehvel ram puanzar rawnga chei tur niin, hemi chhung hian sawrkar office, zirna in, sawrkar quarters leh mimal inah te India ram puanzar zar ṭheuh turin Lunglei District Independence Day Celebration Committee chuan District mipuite a ngen a ni.

Kumin Independence Day lawmna hi C. Ṭhuamluaia Mualah August ni 15, 2025 (Zirtawpni) zing dar 9:00-ah hman tur niin, Mizoram Home Minister Pu K. Sapdanga chu khuallian tura beisei a ni a. Muala Independence Day lawmna hun hman zawh, chawhma dar 11:00-ah DC Bangla tualah ‘VIP At Home’ buatsaih tum a ni bawk a. Lunglei District-a chhawmdawlna in, damdawi in leh District Jail-ah te Independence Day pual ṭanpuina thilpek pek leh tum a ni bawk.