Health Minister Pi Lalrinpuii`n Women’s Polytechnic zirlai lut tharte Freshers` Social a hmanpui

Health Minister Pi Lalrinpuii chuan vawiin khan Women’s Polytechnic Aizawla zirlai lut tharte lawmna Freshers’ Social ah khuallian niin a hmanpui.

Pi Lalrinpuii chuan zirlai lut tharte chu duhsakna hlanin zirlaite tan Women’s Polytechnic chu hmasawnna bultanna a nih ngei a beisei thu a sawiin zirlai kalkhawmte chuan an zirlai chu eizawnna tlaka hmang thei turin an thiam a pawimawh thu a sawi. Pi Lalrinpuii hian zirlaite chu Ruihhlo leh HIV laka fihlima chhungkua leh khawtlang tan mi tangkai leh rintlak ni turin a chah a, Women’s Polytechnic atanga zirchhuakte’n eizawnna mumal (placement) an nei zel chu lawmawm a tih thu sawiin, an zirna a that zia a ti lang a ti a. Khawvel hi a chak apiang emaw a fing apiang hlawhtlinna nilovin hun inher danglam zel mila inherrem thiamte dinchhuahna a ni tih tarlangin, Women’s Polytechnic pawh tunlai thiamna leh mamawh mila course-te kalpui zel turin leh kan ram leh hnam tana mi puitling chherchhuaktu ni turin duhsakna a hlan a ni.

Women’s Polytechnic-ah hian Three Years Diploma course pali Modern Office Practice (MOP), Electronic & Telecommunication Engineering (ET), Garment Technology (GT) leh Beauty Culture & Cosmetology-te (BCC) a zir theih a. MOP zir tur hian pawl 12 pass a ngai a, course dang pathum ET, GT leh BCC te hi pawl 10 pass tan a zir theih a. Zirlai zawng zawng awm theihna hostel chang tlung tak a awm a. Zirlaite an zirchhuah hnua hna lo zawn saktu tur Training & Placement Cell tha tak awmin zirlai zirchhuak tawhte hna thawh tur lo ngaihtuah sakin Mizoram pawna company-te nen campus interview te an neihpui thin a. Women’s Polytechnic atanga zir chhuak engemawzat chu India ram hmun hrang hrang leh foreign thlenga hnathawk an awm a, mahni kea ding sumdawnna nei engemawzat an awm bawk a ni.