ZOEN 8 August 2025 : Lunglei District Bawrhsap kaihhruainaa Lungsen Aspirational Block huam chhunga nu leh naupang hriselna atana hma lakna, Project BLOOM chu NITI Aayog hnuaia Aspirational District & Block Programme hnuaia hma lakna ṭha zual zingah thlan chhuah niin, nimin khan New Delhi-a Vigyan Bhawan-a ‘Best Practices Seminar’-ah zir ho atan chhawp chhuah a ni.
Project BLOOM (Better Living through Outreach, Optimal Maternal & Child Health) hi India ram puma Aspirational District 329 leh Aspirational Block 500-a hma lakna ṭha zual, Seminar-a zir ho tura thlan chhuah 19 zingah telin Seminar-ah hian Lunglei Pi Navneet Mann chuan ‘Project BLOOM’ hma lakna leh a hlawhtlinna te tar langin, India ram hmun danga kalpui ve theih a nih dan turte Seminar-ah hian sawi ho zui a ni. Project BLOOM hi NITI Aayog hnuaia Aspirational Block Programme-in hriselna leh chaw ṭha (health & nutrition) chungchanga hmasawnna tehfung a duan hrang hrangah Lungsen Block-in hma a sawn theihna tur leh zaa za (100%) tihhlawhtlin a nih theih nana ruahman niin, June ni 17, 2025 khan kalpui ṭan a ni.
He Project hnuaiah hian nu nau paiin damdawi in ngeiah nau a neih theihna tur inzirtirna bakah damdawi in pan harsatte leh mamawhte tana koh theih lirthei ‘SafeWombWheels’ ruahman a ni a. Nau nei tur leh buaipuitute lo chawlh lailawkna ‘Maternity Waiting Room’ siam niin, chaw ṭha an dawn ngei theih nan ruahmanna siam a ni bawk a. Raipuar an nau pai aṭanga thla thum chhunga inziak lutte hnenah ‘BLOOM Gift Basket’ pek niin, in tin tlawh chhuaka inzirtirna leh inchhiarna te, hri danna pek beihpui thlak leh hriselna lama thawktute training pek te pawh kalpui a ni.
Lungsen RD Block chhunga damdawi ina nau neih (institutional delivery) zat chu March 2023-a 14.73% aṭangin March 2025-ah 43.14%-ah kai chhovin, Project BLOOM hnuaiah June–July 2025-ah chuan 72.2%-ah a kai chho tawh.
Raipuarte’n enkawlna leh chaw ṭha a hun taka an dawn theih nana nau pai aṭanga thla thum chhunga inziah luh (antenatal care – ANC registration) chungchangah pawh, nau pai tirh thla thum chhung (1st trimester)-a inziak lut March 2023-ah 50.6% an awm laiin, July 2025-ah chuan 70%-ah a pung chho.
ICDS hnuaia raipuar chaw ṭha dawng chu 11.3% (March 2023) aṭangin 81.9% (July 2025)-ah a pung chho a. Hemi hun chhung vek hian naupang (thla 6–kum 6) chaw ṭha dawng pawh 6.16% aṭangin 75%-ah a pung chho a. Hri danna dawng pawh kum 2 chhungin 63.8% (June–July 2023) aṭangin 88.9% (June–July 2025)-ah a kai a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni