Mizorama dan kalha hnamdang lo lutte hnawhchhuah runpui an nei dawn

ZOEN 27th August 2025 : Chief Minister Pu Lalduhoman Mizoram chu sakhaw pakhat mifirfiakten camp an neihna tura hmun remchangah ngaih a nih tawh avangin sawrkar laipuia hotute phalna in Mizorama dan kalha hnamdang lo lutte hnawhchhuah runpui an nei dawn a ti.


Vawiin sessionah he thu hi sawiin House Leader Pu Lalduhoma chuan Mizoramah permit nei lova hnamdang awm leh ILP tawp tawh hnu pawha la awm an tam lutuk tih sawiin, local council hrang hrangah a tahtawlin hma an la zel dawn a ti.


Pu Lalduhoma chuan Mizoram-a rel lo lut tur leh KMTTP kawngpui peih tep tawhte chuan nghawng a nei ngei dawn a ti a, tuna Bairabi rel lut ang ngawt a nih loh avang leh mikhual tam tak an lo luh dawn avangin lo inbuatsaih lawk a tul thu a sawi a, kutdawh lo thei lote chu mahni veng theuhah a zawn chhuah theih a ti a, chutiang chu pipute hunlai atanga Mizoten an tih thin a nih avangin mahni veng theuhah theihtawp chhuahin kutdawh awm lo turin social organisation te nen tangrualin sorkar chakna nen khawlaia kutdawh thu an awm lohna turin hmalak a tul a ti a, dan bawhchhetu misual anga chhuah an tum lo a ti a ni.


Pu Lalduhoma chuan vawiina house a putluh Mizoram Prohibiton of Beggary Bill ah chuan mi harsa zawkte tanpuina tur khawn (charity) khapna a lo awm a nih chuan an dan duan chu ennawn a siamthat tul a tih thu a sawi a, he dan hi social Activist te pawn siam tura an ngen ngawih ngawih thu sawiin, he dan hian ADC area pawh huam ngei se tha a tih thu a sawi a ni.