Eptu MLA ten Mizoram Prohibiton of Beggary Bill chu thil tul-ah an ngaih loh thu an sawi.

ZOEN 27th August 2025 : Vawiin sessiona Mizoram Prohibiton of Beggary Bill sawihonaah Oppostion Leader Pu Lalchhandama Ralte chuan Mizoram thlirin he bill hi House-a pharh a hun a la tih loh thu a sawi a, kutdawh awm lo se tih an duh rualin, kutdawh awm lo turin mipuite changkang thei se an duh thu a sawi a, he bill hian Zo-inspiration leh media hrang hrang kaltlanga mi harsa zawkte tana tanpuina khawn te, krismas leh kumthar inkara vantlang hmuna pawl leh mimal ten zai hmanga tanpuina an khawn thin te pawh khap tel a ni dawn a ti a, tanpui ngai leh dawmkan ngaite dawmkai thinna Mizo nun ze mawi leh Kristian nun mawi khapna tur nia a hriat thu a sawi a ni.
Kutdawh khapna dan hi Central sorkar leh state sorkar ten an siam theih laiin, vawiin thlengin central sorkarin a la siam lova, Ministry of Social Justice and Empowerment chuan kutdawhte enkawl leh hmalam hun siam turin hma a lak mek laiin Mizoram sorkarin dan a duanah chuan kawngsira mitdel zai thinte tiamin kutdawhte chu Police ten manin, bond-ah cheng sang 5 a chawitir dawn a, man nawn an nih chuan cheng sing 1 thleng chawitir theih a nih thu sawiin, kutdawhten eitur pawh an neih loh laiin khawia pawisa nge an chawi ang tih leh kutdawh mante pawisa chawi tlingkhawm sorkarin a it em ni tih zawhna a zawt bawk a. Kum 20 liamta atanga Bairabi-a rel a lo luh chhungin kutdawh an lo lut hum hum loh avangin Sairanga rel lo lut tur hlauhthawmah a ngaih loh thu a sawi bawk a, ILP tel lova lo lutte chu thawn thla zawk mai turin a rawt bawk a ni.


BJP MLA DR. K Beichhua chuan Kristian state a nih angin Mizoramah kutdawh khap lova kutdawh tih rem dan tur kawng a awm zawk a rin thu a sawi a, social issues kaihhnawihah chuan India Danpui hnuaiah Autonomous District Council te chuan mahnia dan an in siam thei tih sawiin, he bill in Mizoram pum a huam tur thu chu ennawn leh se tha a tih thu a sawi a ni. He bill hian pianphunga rualbanlote a huam dawn avangin chung mite chu dan bawhchetute ah chhiar an ni dawn nia a hriat thu sawiin, mi chhumchhiate rahbehna ang tih thu sawiin, thlawp harsa a tih thu a sawi bawk a ni.


Congress MLA Pu Ngunlianchunga chuan rel lo lut tur avanga kutdawh an lo lut teuh tur anga ngaih chu thil dik nia a hriat loh thu a sawi a, ILP tel lo chuan tumah Mizoramah an lut thei lova, sorkar chuan chuti lam chu khauh zawkin kalpui se a tih thu a sawi a, kohhran upa a nih ang pawhin kutdawh khapna bill chu a thlawp thei lo tih a sawi a, kutdawhte chu pianphunga rualbanlote an ni a, an duh avanga kutdawh an ni bik lo tih sawiin, Pathian Lalram din tum sorkar tan chuan an bill putluh chu inrem loh a tih thu a sawi a, state dangte chuan lo ti mah se, kristian state kan nih angin tanpui ngaite tanpui tur zawk nia a hriat thu a sawi bawk a ni.