Mizoram Assembly Fur thutkhawm-ah Forest (Conservation) Amendment Act hman turin pawm a ni.

ZOEN 27th August 2025 : Mizoram Assembly Fur thutkhawm tanni vawiin khan Mizorama Forest (Conservation) Amendment Act hman turin pawm a ni.
Environment, Forests & Climate Change Department Minister Pu Lalthansanga Official Resolution putluh Forest (Conservation) Amendment Act, 2023 (No.15 of 2023) stands applied to the whole of Mizoram” tih chu pawm a ni.
Pu Lalthansanga chuan he resolution hi sorkar hmasaah khan dodal a lo ni tawh a ti a, Forest (Conservation) Amendment Act, 2023 chuan Forest (Conservation) Act, 1980 chu siamthat a tum a, a thil tum ber chu India ramngaw leh biodiversity humhalh ruala hmasawnna tluantling neih a ni a ti.
Inkaihhruaina tharah chuan exploration leh survey thenkhat bakah thing 100 thleng kih theihna chu central sorkara thlen ngai lovin state sorkar in phalna a pe thei tawh dawn tih Minister chuan sawiin Forest kaihhnawih project hrang hrangah te state sorkarin awlsam zawkin thutlukna a siam thei tawh dawn bakah venhimna lam siam pawh a ti awlsam dawn a, ramngaw enkawlna tha zawk neih theihna a ni a ti.
He dan hnuaiah hian ramngaw leh thing awmna chu a ram zau zawng hmun 3 a thena hmun 1 thlenga tihpun tum a nih thu te, chu chu an than chhoh zelna tur kawng nen pawimawhna pek a nih tur thu te, ramngaw enkawl lama hamthatna leh enkawltute eizawnna tihchangtlun te pawh a tel a, hei bakah hian Forest ram rel kawng emaw vantlang kawng sorkarin a enkawl, mihring chenna kalpawhna atana pawimawhte chu hectare point 1 thleng thiah theih a ni a, ram hmasawnna atana pawimawh, kalkawng, rel kawng leh transmission line bakah ram himna chungchanga pawimawh, international border, line of control leh line of actual control atanga kilometre 100-a awm te invenhim nan leh ruhrel pawimawh din nan ram hectare 10 thleng hman tura forest land ruahman a nih thu te a sawi.