Ni 2 awh tur Mizoram Legislative Assembly fur thutkhawm chu tan a ni

ZOEN 27th August 2025 : Mizoram Legislative Assembly fur thutkhawm ni hnih awh tur chu vawiin khan Speaker Pu Lalbiakzama kaihhruaiin tan a ni.
Assembly thutkhawm hi vawiin chawhma dar 10:30 khan tan a ni a, House tan anih velah Session neih hnunhnung ber leh tun session inkara member thi sunna hun hman niin hemi hnu hian paper hrang hrang leh report house dawhkanah pharh a ni a, Forest Minister Pu Lalthansanga’n Official Resolution pu lutin, sawiho anih hnuah pawm a ni a.
Social Welfare Minister Pi Lalrinpuii’n The Mizoram Prohibition of Beggary Bill, 2025 a pu lut a, The Mizoram (Land Revenue) (Amendment) Bill, 2025 chu a changtu Minister Pu B. Lalchhanzova’n a pu lut bawk a ni.

Session ah hian Speaker Pu Lalbiakzama chuan Panel of Chairman mi 4 ruat an nih thu sawiin, Lunglei West bialtu MLA Pu T. Lalhlimpuia, Mamit bialtu MLA Pu H. Lalzirliana, Tuirial bialtu MLA Pu K. Laldawngliana leh Tuichawng bialtu MLA Pi Prova Chakma te chu Panel of Chairman atan ruat an nih thu a sawi bawk.

Vawiin fur thutkhawm ah hian Rajya Sabha MP hlui, Pu Ronald Sapa Tlau leh Dampa bialtu MLA Pu Lalrintluanga Sailo sunna hun hman a ni a, House Leader Pu Lalduhoma chuan ram hruaitu boral ta pahnih te chu an ui takzet tih sawiin an sulhnu tam tak a awm thu a sawi a, eng party pawh sorkar se, sorkar dinglai chuan Member chatuan ram pan ta chhungkuain harsatna leh mamawh hrang hrang an neih te tihsak turin an inhawng reng tih a sawi a ni.

Pu Lalchhandama Ralte, Oppostion Leader chuan ram hruaitu pahnih an sun tak te chu an ui takzet tih sawiin Mizoram tan channa nasa tak anih thu a sawi a, ram hruaitu an ui thu hi member hrang hrangin an sawi zawh hnuah Speaker Pu Lalbiakzama kaihhruaiin ngawi rengin minute 1 chhung dingin MLA chatuan ram pantate hi sunna an nei a ni.