Nikhat atan Bawrhsap (Be Deputy Commissioner for a Day) hun hman dan tur sawiho

ZOEN 26th August 2025 : Vawiin khan Lunglei District Bawrhsap Pi Navneet Mann ruahmanna leh hma laknaa Lunglei khawpui chhunga zirlai naupangte’n Bawrhsap hna thawh dan a taka an hriatna tur leh mawhphurhna pawimawh la ngam tura fuih phurtu atana ruahman, “Ni khat atan Bawrhsap (Be Deputy Commissioner for a Day)” tih kalpui dan tur sawi ho a ni.

Bawrhsap Pi Navneet Mann kaihhruaia a hna thawh pindana ṭhut khawm buatsaihah hian DC officer-te bakah, Education leh I&PR official-te bakah MJA hruaitute leh Zonet JB lunglei hnathawktute telin, August ni 27, 2025 (Nilaini)-a Lunglei District Bawrhsap pisaa “Be DC for a Day” hun hman dan tur ruahmanna thlir hovin, thil ṭul hrang hrang an sawi ho.

Bawrhsap Pi Navneet Mann chuan he hma lakna hi Nasha Mukt Bharat Abhiyaan hnuaia hma lakna peng khat atana ruahman a nih thu sawiin, ruihhlo hman khawlohna laka zirlaite ven himna tura kalpui a nih thu a sawi a. He hma lakna kal tlang hian zirlaite chuan DC office hna thawh dan leh nitina DC-in hun a hman dan te, department hrang hrang leh mipuite nena an indawr dan te an hriat theih dawn thu sawiin, hei hi an hma hun atana tum ruhna leh phurna petu atan leh an tum hlen tura ruihhlo laka fihlim a pawimawhzia an zir chhuahna atan tawn hriat pawimawh tak a nih beisei a ni, a ti.

He hma lakna atan hian Lunglei khawpui chhunga pawl 9 aṭanga pawl 12 zirlai naupang paruk thlan chhuah an ni a, ruahman lawk dan chuan, August ni 27, 2025 (Nilaini) zing dar 9-ah Bawrhsap lirthei hmangin zirlai thlan chhuah 6 te hian Bawrhsap pisa thlengin, Bawrhsap hna thawh dan hrang hrang hrilhfiah an ni anga, chumi hnuah pindan hrang hrang fang kualin, hnathawktute nen inkawmna an nei ang. Department hrang hrang ten an hna thawh dan DC-a an report leh DC dawrtu mipuite mamawh ngaithlain, thu thar thehdarhtute nena inkawm hona hun an hman bakah, hmasawnna hnathawh kal mek a hmunah an tlawh bawk ang a. He’ng hun buatsaih hrang hrangah hian zirlaite hian Bawrhsap angin official-te, mipui leh chanchinthar lakhawmtute hi an hmachhawn dawn a ni.

An hun hman an turte hetiang hian ruahman a ni.

9:30-10:30AM: Office Tour & Meet the staff (He hunah hian planning, Establishment, ADHAAR Cell, DM&R leh Election Branch etc te an tlawh ang)

10:00-11:00AM: Mock Meeting:

Zirlai te hi Group 2 ah inthenin DC mawhphurhna la in Deptt hrang hrang report te an lo dawng ang a, LMC, DRDO, Supply, Revenue, Transport, Education, etc ten report an pe ang a, Deptt tin hian 5 mins vel hun an hmang ang.

11:00-12:00PM: Public Grievance:
Zirlai tin te hian 10 Mins chhung DC angah tangin a dawrtu te an lo dawngsawng ang a, Sorkar Deptt hotu te hnenah tunlai thil thleng anga hmalak dan tur te an hrilh ang.

12:00-1:00PM: Press Conference an nei ang a, MJA te nen hun an hmang ang a, zawhna 6 pek an ni ang.

1:00-2:00PM: Lunch Break

2:00-3:00PM: Field Inspection: DCSO Office hmun a Car park na tur siam mek leh Damdawiinah health ATM an tlawh ang.

3:00-4:00PM: Hun an hman dan sawiin an rilru a khawih dan te ngaihthlak a ni ang

4:00-5:00PM: DC kaihhruaina in kharna hun hman a ni ang a, Certtificate sem a ni ang.