ZOEN 26th August 2025 : Lunglei Municipal Council (LMC) hotute chuan vawiin khan Lunglei Convention Centre, BoC Meeting Hall-ah LMC in an hma lakna hrang hrangte an puang.
He hun hi Pu Lalzuithanga Chairan, Lunglei Muncipal Chairman chuan kaihruaiin, LMC hma lakna hrang hrang a tar lang a. Chairman hi Vice Chairman Pu K. Lalrinawma, Executive Councillor – Pu Zorinsanga Hmar leh Pi Lalhruaitluangi Sailo, Chief Executive Officer Pu Donny Lalruatsanga leh Secretary Pi Zoramdini te’n an ṭawiawm.
LMC hi kum 2022 April ni 8 khan din niin, ni 29.03 2023-ah inthlan hmasa ber buatsaih a ni a; mumal taka office luah ni chu ni 13.04.2023 a ni. LMC hnuaiah regulations leh rules pakua hman leh kalpui mek niin, he’ng zingah hian LMC Licensing Regulations, LMC Control of Parking and Collection of Parking Fees Regulations, Solid Waste Management Bye Laws leh The Mizoram Urban Area Building Regulations te chu a langsar zual a ni a. LMC hnuaiah subject leh fund hrang hrang kalpui mek 17 awmin, he’ng zingah hian Urban Local Body Grant, Ward Fund, Building Regulations leh Property Tax te chu a langsar zual a ni bawk.
State Priority Projects (SPP) hnuaiah Lunglei khawpui tana pawimawh tur project panga, cheng vaibelchhe 17.50 hu pawmpuina hmuh tawh niin, chu’ng zingah chuan Sazaikawna LMC Complex sakna tur (₹ vaibelchhe 4), Hrangchalkawna Transport Hub sakna tur (₹ vaibelchhe 3.5), Ramthar AOC-a Market Shed sakna tur (₹ vaibelchhe 2) leh C. Ṭhuamluaia Muala Multi-Level Car Parking sakna tur (₹ vaibelchhe 3) te a tel a. Green Park siamna tura SPP aṭanga cheng vaibelchhe 5 pawmpuina hmuh tawh chu remchan zawkna avangin Saikuti Hall chei ṭhat nana hman turin Board of Councillors (BoC)-in a pawm tawh thu leh DPR siam tura inbuatsaih mek a nih thu tar lan a ni bawk.
LMC hma lakna hrang hrang tar lan zingah, kum 2025 Krismas Bazar chu BoC-in a pawm angin Task Force Committee on Krismas Bazar chuan hmun remchang melhin ruahmanna a kalpui mek tih tar lan a ni a. Kum 2025 Krismas vuakveta kawn chei ṭha leh mawite tan LMC-in lawmman siam a tum thu leh lawmman hi pakhatna cheng nuai 3, pahnihna cheng nuai 2 leh pathumna cheng nuai 1 bakah, veng pathum tan consolation prize cheng sing 3 ṭheuh pek tum a nih thu tarlan a ni bawk a ni.
LMC hnuaia kum 2024-25 chhung atana property tax pek tur chu online-a pekna hun hawn a nih bakah, tunah hian Local Council-te kal tlangin khawn mek a ni a. Chhiah pek ngai in leh lo (property) 9,659 chhinchhiah niin, mi 1,493-in online-in property tax hi an pe tawh a; a bak mi 8,166 chu LC kal tlangin khawn a ni a. Property tax khawn chhuah tura chhut hi cheng nuai 102.14 niin, Local Council kal tlanga khawn hi Sethlun LC chuan an pe tlak tawh tih tar lan a ni.
LMC hnuaiah chhiarpui (demographic census) kalpui mek niin, ward pali-ah pilot project atan Garbage Free City Lunglei Project 2025 kalpui mek a ni bawk a. LMC hnuaiah hian mi 260 hnenah in sak phalna (building permission) pek chhuah tawh niin, dawr licence 2,354 siam a ni tawh bawk a. Phalna hrang hrang online-a dil theihna tur LMC e-Permit Management System ruahman mek niin, LMC chungchang leh hriat tur hrang hrang awlsam taka hriat theihna tur LMC AI Apps siam tura phalna dil mek a ni bawk.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni