Mizoram Police IGP, Pu H. Ramthlengliana hovin Myanmar ramri khuate tlawh

 

Pu H. Ramthlengliana leh a team te hi nimin khan Tlangsam khawtlang hruaitute nen Tlangsam YMA Hall-ah hun an hmang a. Zote Community Hall-ah Zote, Ngur leh Ngur Vengsang khawtlang hruaitute nen inkawm leh in, tlai lamah Zote bul, Tiau lui kama Bulfek,Myanmar khawtlang hruaitute nen an inkawm leh bawk a ni.

Vawiin hian Hnahlan, N.Diltlang, Khuangphah leh Vaikhawtlang tlawhin khawtlang hruaitute an kawm leh ang.

Tiau lui atanga Mizorama Ruihhlo (drugs) a lo luhna kâi khàn awmna khua zawng zawngte fang chhuak a, khawtlang hruaitute nena inkawm hona hun hmang tura kal an ni, Sesih, Lianpui, Leisenzo, Vangchhia, Vaphai, Saikhumphai leh Farkawn khua te fang zelin tunkar hun chhung hian hun an hmang anga, Zirtawpni khian Champhai ah Khawtlang hruaitute leh tlawmngai pawl hruaitute nen ruihhlo do ho dan tur an sawiho leh dawn a ni.

Mizoram Sawrkar ruahman dan chuan ramri hrul khaw tinah hian Police in-dahin September ni 1in Ruihhlo lo lut tur lakah beihpui thlak hi kalpui tur a ni dawn a ni.

IGP, Pu H.Ramthlengliana hova ramri tlawhchhuah programme hi Addl. SP Champhai Pu Victor Zothansanga leh a thawhpui ten an lo tawiawm a. Central YMA atangin Asst. Secretary Pu Fabian Lalfakawma, Treasurer Roneihthanga leh Finance Secretary Pu MS Ralte te bakah CEC mi 3 leh Champhai Sub. Hqrs. YMA hruaitute an tel a ni.

Puan tawh angin Home Minister Pu. K.Sapdanga’n thla thar, September ni 1 atangin khawlai him leh muanawm zawk siam turin Mizoram Police ten beihpui an thlak dawn tih a lo sawi tawh a. Ramri kil tin atanga ruihhlo lo luhna te zirchian mek a ni tih sawiin, Mizoram Police hotuten a hmunah an luhchilh dawn a, Excise Force te leh tlawmngai pawlte nen tangrualin ruihhlo do beihpui thlak tum a ni a ti.

Home Minister chuan Mizoram chu ruihhlo leh ngawlveina laka chhanhim turin theihtawp chhuah tum a ni tih sawiin a bultan hautak hle dawn mahse Police officer te leh tlawmngai pawlte zarah beiseina sang tak an nei tih a sawi a ni.

Pu K sapdanga chuan, Mizoram chu ruihhlo in a chiah hneh hle a, ruihhlo ngawlvei tam tak zalen taka khawlaia leng thin te chuan mipuite zalenna a nekchep a, zanah chuan hmeichhia chu sawi loh mipa pawh lenpui nei lovin khawlaiah vah mai mai ngam a ni tawh lo a ti a. Ruihhlo ti mite avanga mipui nun chep phah chu a thlen an phal reng tur a ni lo tih sawiin, September ni 1 atang chuan khawlai him leh muanawm zawk siam turin beihpui thlak tumin Mizoram Police hotuten ruahmanna an siam tih a sawi a ni.