ZOEN 18th August 2025 : Mizorama Health ATM hmasa ber, Lunglei District Administration hma lakna, “Healthy Lunglei Initiative” hnuaia Civil Hospital Lunglei leh Primary Health Centre (PHC) Lungsena khawl bun thar chu vawiin khan Health & Family Welfare Minister Pi Lalrinpuii’n a hawng.
Health ATM thar hawnna hun, Civil Hospital Lunglei Seminar Hall-a buatsaihah Health Minister Pi Lalrinpuii chuan Mizorama Health ATM hmasa ber hawngtu a ni chu vannei a intih thu sawiin, Lunglei District mai ni lo, Mizoram State pum pui tan he hun hi hun ropui leh chhinchhiah tlak tak a ni, a ti. June 2024-a ama hova hawn, Healthy Lunglei District Campaign hnuaiah natna inkai chhawn theih loh (non-communicable disease – NCD) endikna leh a chungchang inzirtirna ngawrh taka kalpui a nih thu leh mipui vantlang thawhpuina azara hriselna lama than harhna leh hmasawnna hmuh zel a nih thu sawiin, tuna Health ATM hawn a ni leh ta chu he hma lakna hlawhtlinna belhchhahtu a ni a ti. Health ATM chu mipuite’n rang taka mahni hriselna dinhmun — BP, zunthlum, taksa inphut dan (BMI), taksaa boruak thianghlim oxygen awm zat, leh thil dang tam tak hriat nan a hman theih dawn a, a khawlte chu IoT (Internet of Things) technology nena thuam a nih avangin, result a pek chhuah zung zung bakah, a hmangtute hriselna dinhmun chu lo chhinchhiahin, digital health record a vawng tha nghal zel dawn a, inentir tura damdawi in lian zawk pan nana sum, hun leh tha tam tak sen ngai thin chu eng emaw chen a chhawk zangkhai thei dawn a ni, a ti.
CHL NCD Clinic-a MO Dr Lalremmuana Ralte chuan Health ATM hman dan a taka entirin, Health Minister chu Health ATM hmang hian a hriselna dinhmun endik nghal a ni . Health Minister Pi Lalrinpuii hian Civil Hospital Lungleia Integrated Public Health Laboratory sak thar leh luah luh thar bakah, Trauma Centre building-a Mizoram Universal Health Care Scheme (MUHCS) hnuaia damlo na zual enkawlna tur, ICU siam thar chu a enfiah nghal. Health ATM-ah hian test chi hrang hrang 35 vel ti theiin, taksa nihphung tlangpui, zunthlum, thisensang, lung lam, beng, mit leh rilru lam dinhmun te a endik theih dawn a. Hriselna atana ei leh in fimkhur dan tur thurawn te pawh a awm. Test hrang hrang hi a thlawn veka tih theih niin, darkar chanve tling lova tih zawh vek theih a nih bakah, test result hi mahni phone-ah a dawn nghal theih a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni