MZP General Headquarters chuan, Vanapa Hall kawt-ah hmarchhak biala ramdang mi an duhlohna tarlangin an pungkhawm

MZP huaihawt “Sit-in Protest against illegal immigration in North East States” hi hmarchhak state dang ruala neih niin MZP President Pu H. Lalthianghlima chuan hmarchhak state ah ramdang mi Bangladesh atanga lokal an tam avangin buaina hrang hrang a awm phah a ti a, Assam chu buai ber anni tih sawiin Mizoram pawh harh thar an tul hle tih sawiin Sawrkar chuan ruahmanna khauh tak siamin ramri venghim se an duh tih a sawi.

NESO Vice Chairman Pu Ricky Lalbiakmawia pawhin thu sawiin kum tam tak kal ta atangin Hmarchhak bial ten dan lova lo pem lutte thununna leh um zuina tha tak a neih loh avangin harsatna a lo tawk nasa tawh a ni a ti a, ram leilung fa ngei te hamthatna tur hrang hrang an chuh ve zel tih sawiin theihtawpa sawrkar a tan a ngai a ti a, Bangladesh atanga raltlan an tam avanga Assam sawrkar in a hnawhchhuah runpui a kalpui mek chu an thlawp tlat tih sawiin Mizoram ah pawh ramri venhim kawngah nasa zawka tan lak a tul thu a sawi bawk.

NESO Coordinator H. Hrangkunga chuan vawiina an punkhawm chhan chu hmarchhak bialah dan loa ramdang mi pem lut te dang tura sawrkar nasa taka an nawrna in awmzia a neihloh avanga pungkhawm an nih thu sawiin Dan lova ram chhunga rawn pem lutte chu hmun dangah sawn kual mai mai an nih lohna turin thenawm State-te leh a kaihhnawih Agency-te nena thawhhona tha neih an duh thu a sawi bawk.