ZOEN 18th August 2025 : Lai Autonomous District Council, Chief Executive Member atan M.Kawnpui bialtu Pu N.Zangura chu vawiin khan Additional DC Lawngtlai Pu David Lalrinawma’n rinawmna thu tiamtirin a la lut.
CEM lakluhna inkhawm, LADC a Exeutive Secretary Pu K.Lalthanzara kaihhruaiah hian CEM thar Pu N.Zangura chuan LADC Term 11-na ah hun harsa tak tak an tawk tih sawiin, hun pawimawh ah ram hruai hna thawk tura a chunga mawhphurhna tla chu lawmawm a tih rualin amah chauh chuan hma chhawn ngaihna a awmlo a ti a, LADC member, hnathawktute, Kohhran leh khawtlang hruaitute leh ram mipuite thawhpuiah sawmin, LADC tan ngaihtuahna sengthar tur leh engkimah finchhuah thin turin a sawm a ni.
United Democratic Alliance hruaitu Pu N.Zangura hian a chan pual bak engmah a beisei loh tur thu sawiin, pawisa chu dik taka hman a nih chuan ram mipuiten engemaw zawng talin an tangkaipui ngei a beisei thu a sawi a, LADC hnuaia thawkte leh a Sorkara a thawhpuite pawh sum thianghlimlo laka inthiarfihlim ngam turin a a chah a ni.
Pu N. Zangura hian a thawhpui tur Executive member pakua chu vawiin khan a ruat nghal a, LADC ah hian MDC 25 awmin tun dinhmunah UDA ah hian MNF MDC 11 leh BJP MDC pahnih an awm bakah pawn lam atangin Congress MDC neih chhunin a tlawp a, an vaiin member 14 an nei a, ZPM in MDC 11 an nei thung a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni