ZOEN 18th August 2025 : Mamit district Zawlnuam RD block chhunga Saikhawthlir ram chhung Diltlang Lui zau-a Assam official-te’n rubber huan an tihchhiat chungchangah nimin khan Mizoram leh Assam lam aiawh hotute leh Saikhawthlir khawtlang hruaitute thil thlenna hmunah kalin an inbiaa, hotu sang zawk ten inbiakna an neih leh hma chuan khawi lam zawk zawk pawhin kut kutthlak tawh hrih loh nise an ti a ni.
Tarlan tawh angin inrinni chawhnu dar 2 vel khan, Diltlang lui zau a Rubber tiak phun sa leh phun turte chu Assam lam police leh Assam forest lamin an tichhia a, Saikhawthlir VCP Pu Lalthuthlungmawia hnen atanga thudawn danin Assam police mi 8 leh Assam forest mi 2 te lokalin Diltlang lui zau a Mizoram Land Resources, Soil & Water Conservation Department-in a kalpui mek CM Rubber Mission hnuaia rubber chingtute Rubber phunsa leh la phunloh rubber tiak 300 vel chu an rawn sam chhia a ni.
Saikhawthlir VCP Pu Lalthuthlungmawia chuan Diltlang lui zau ah hian VC ten ram thehin chhungkaw 15 ten eizawn nan rubber an ching a, Diltlang lui zau hi Assam lam chuan reserve forest area angah ngaiin thlai ngialnghet chin phal a nilo an tih avangin rubber tiak te pawh rawn tichhia an ni a, amaherawhchu hetia reserve forest area anga sawi si hian Gurguthi / Assam lam atang hian Assam mite chuan kuhva an ching thung a ni a ti. Saikhawthlir khawtlang hruaitute chuan an khawtlang chhungkaw thenkhatin harsa tak a an hnathawh hetia tihchhiat sak an ni ta hi pawi an tiin sorkar atangin zangnadawmna dawng ngei se an ti a ni.
Assam Police leh Assam Forest te hian tun thla ni 5 khan helai hmun ah tho hian lokal tawhin Rubber phun mek te hi an rawn en thli thlai tawh ni a sawi a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni