Inrinni chawhnu dar 2:10 khan Mamit district Zawlnuam RD block chhunga Saikhawthlir ram chhung Diltlang Lui zau-ah Assam official-te’n rubber huan an rawn suasam.
Saikhawthlir VCP Pu Lalthuthlungmawia’n Akashvani Aizawl a hrilh danin an khaw mi 2-te rubber chinna huan rawn kalchilhtu Assam Police mi 8 leh Forest mi 2-te chuan an rubber phun sa leh la phun loh thlengin an tihchhiatsak vek a. An suasamsakte hi Pu Zoliana rubber kung phun tawh 240 leh la phun lohte bakah Pu Loba rubber kung 50 te a ni a, an kir leh hnu-ah rubber huan neitute hian a bul hnai a border Police Outpost chu hriattir mah se, an insaseng hman tawh a ni. He lai hmuna rubber chinte hi Chief Minister Rubber Mission hnuaia kalpui a ni a. Rubber phun a hna thawk a awm hmanrua te hi Assam official-te hian chhuhsak bawk a ni.
Tukin khan Saikhawthlir khawtlang hruaituten helai bul hnai a Police border outpost tlawhin thil thlen dan an hriattir a, tun hnu a a thlen leh tawh loh na’na venhimna lam kalpui dan tur chungchangte an sawiho a ni.
Pu Lalthuthlungmawia chuan Assam Police leh Assam Forest te hi kuminah rubber chinna hmuna an rawn kal vawi hnihna a nih thu a sawi a. Tun thla ni 5 khan helai hmun ah hian lokalin rubber chinna hmunte hi an rawn thlithlai a, hemi tum hi chuan huan neitute pawh hawihhawm ang reng taka bia-in thla te an la a, an kir leh mai niin a sawi a. Kum kal ta lam pawh khan an rawn tibuai tawh thin niin a sawi bawk.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni