District Hospital, Siaha-ah Haemodialysis Centre Health Minister in a hawng

ZOEN 15th August 2025 : Vawiin khan Health Minister Pi Lalrinpuii chuan India ram puma ropui taka hman Independence Day chu Siaha, SDFA Ground, Meisatla-ah Khuallian nia a hmanpui hnuah MADC CEM huaihawt VIPs At Home hun a hmanpui leh a, Hemi zawh hian District Hospital, Siaha-ah Haemodialysis Centre a hawng nghal a ni.

Hawnna hun tawi District Hospital-a neih hi District Medical Superintendent (DMS) Dr C Lalrosanga chuan a kaihruai a, Hun rei tak ata tawh an lo nghahhlel em em Dialysis Centre khum 4 awmna hawn theih a ni ta chu ropui takzet tiin Minister chungah lawmthu a sawi a ni.

Minister Pi Lalrinpuii chuan Mizoramah Dialysis mamawh thahnem tak an awm a, kal thalo enkawlna khawl pawimawh tak, Haemodialysis Unit hlawhtling taka bun a nih theih nana rilru leh ngaihtuahna sengtu, District Hospital-a thawktute chungah lawmthu a sawi a. Siaha district mipui zinga he khawl mamawhte tan malsawmna leh damna thlentu a nih ngei a beisei thu a sawi a, a thawktute chu damlote tan taksa leh rilru damna thlentu ni zel turin a chah bawk a ni.

Haemodialysis Centre a hawn zawh hian Minister chuan Khum-3 awmna District Hospital ICU a tlawh nghal a, ICU room mamawhte enfiah nghalin inthlahrung lova Hospital mamawhte a hnena thlen thin turin thawktute a chah bawk.

Vawiina hawn tak Haemodialysis Centre-a khawlte hi Indian Oil Cooperation Ltd leh Fairfax CSR sum atanga dawn a ni a, cheng nuai 15 man hu RO plant erawh National Health Mission atanga dawn a ni thung. Room chhung Plumbing, wiring leh thildangte chu NHM atanga dawn niin a chhunga khum 4 te chu DHME atanga dawn a ni thung a ni.

Social Welfare, Tribal affairs, Women & Child Development Minister nibawk Pi Lalrinpuii chuan vawiin vek khan Tipa a CDPO Office hawng turin a kal nghal a, Siaha-ah rawn let lehin naktukah Aizawl lam panin a chhuak leh dawn a ni.