ZOEN 13th August 2025 : 2025 Independence Day lawmna puala ram chhung in tina Ram Puanzar zar (Har Ghar Tiranga) beihpui thlak leh tura sorkar laipuiin ruahmanna a siam bawhzui nan leh mipuiin phur taka Ram Puanzar an zar theih nana inzirtirna pakhat atan vawiin khan District Administration huaihawtin Lungleiah ‘Tiranga Yatra’ buatsaih niin, Independence Day lawmnaa parade contingent turte’n India Ram Puanzar (Tiranga) kengin kawng an zawh.
Zing dar 9-ah C. Ṭhuamluaia Mual, Lungleiah Independence Day inpuahchahna en chhinna (final rehearsal) buatsaih niin, Bawrhsap Pi Navneet Mann leh Superintendent of Police Pu J. Lalmuankima te uapna hnuaiah India Ram Puanzar chungchang leh a pawimawhna te, enkawl dan tur leh zah tak leh chhuang taka zar ṭhin tur a nih dan te zir ho a ni a. Hemi hnu hian parade contingent-te chuan C. Ṭhuamluaia Mual aṭangin Ram Puanzar kengin kawng an zawh a ni.
Kumin 2025 Independence Day pual hian August 2 – 15 inkar chhungin ram chhung in tina Ram Puanzar zar beihpui, “Har Ghar Tiranga” campaign chu kalpui leh mek a ni a. Hemi chhung hian ram leh hnam tan ṭhahnem ngaihna rilru pu chunga phur taka mahni chenna inah India Ram Puanzar (National Flag) zar chhuak ṭheuh tur leh ram puanzar nena mahni thlalak (selfie) te www.harghartiranga.com -ah upload turin Lunglei District Independence Day Celebration Committee chuan District mipuite a ngen a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni