DDMA hnuaia Joint Inspection Team chuan Bualte leh Ṭhualṭhu inkara lei min nasatna hmun an tlawh

ZOEN 13th August 2025 : Nimin khan Lunglei District Disaster Management Authority (DDMA) Chairman, District Bawrhsap Pi Navneet Mann hovin DDMA hnuaia Joint Inspection Team chuan National Highway-2 kawngpui, Bualte leh Ṭhualṭhu inkara lei min nasatna hmun chu a hmunah an enfiah a, harsatna thleng mek chin fel dan tur leh hma lak zui dan tur an sawi ho.

Lunglei DDMA hnuaia Joint Inspection Team chuan lei min dinhmun hi zir chiang turin nimin khan a hmun hi an tlawh hmasa a. Joint Inspection Team hi Zonal Officer & BDO Lunglei Pi Grace Lalremdiki Sailo chuan hovin, PWD, P&E, PHED, I&PR leh Geology & Mining official-te, kawng enkawltu NHIDCL leh hna thawktu BRNIPL ai awhte, Lunglei Sub-Headquarters YMA hruaitute, Bualte leh Ṭhualṭhu Local Council leh Branch YMA hruaitute an tel a. Lei minna hmun tlawha an enfiah hnuah an thil hmuh dan chu Bualte VC House-ah Bawrhsap hova sawi hovin, ruahmanna hrang hrang an siam a. Bawrhsap ho hian lei minna lai hi a hmunah an enfiah leh bawk.

Bawrhsap Pi Navneet Mann chuan Bualte leh Ṭhualṭhu inkara lei minin harsatna a thlen chu mihring thunun theih bak a nih thu sawiin, mihring tana tih theih chu harsatna kara thawh ho leh inṭanpui tawn a nih thu a sawi a. Chumi chu a taka lan chhuahtir a, khualzin tangkhangte mamawhna zawna pui tura Bualte leh Ṭhualṭhu khawtlang inpekna chu chhuanawm a tih thu sawiin, an inpeknaah lawm thu a sawi a. Khawtlang senso leh khualzinte mamawh phuhru turin DDMA aṭangin sum leh paia ṭanpuina pek a nih thu leh a ṭul angin sum bakah, ruahmanna hrang hrang nen an ngaihven zui zel tur thu a sawi a. He lai kawnga harsatna thleng mek chin fel dan tur leh tlo leh daih rei zawka hma lak dan tur pawh ruahman mek a nih thu a sawi.

Zonal Officer Pi Grace Lalremdiki Sailo chuan tun ṭuma Bualte leh Ṭhualṭhu inkara lei min thlen dan leh DDMA aṭanga hma lakna report a pe a. Department hrang hrangte, NHIDCL leh BRNIPL te’n an hma lakna report pein, rawtna an neihte an tar lang a. Bualte VCP Pu K. Malsawmkima, Ṭhualṭhu VCP Pu K. Rozawna leh Sub-Headquarters YMA Vice President Pu CMS Dawngliana te pawhin an hma lakna leh rawtna hrang hrang an neihte an sawi bawk.

Lunglei Zone Geology & Mining Department lam chuan August ni 4, 2025 khan he lai lei minna dinhmun hi lo zir chiang tawhin, nikum aia kumina a let deuhthawa ruah tui a tam avangin leh a lei a ngheh loh avangin lei min hi thleng nia an hriat thu an sawi a. NHIDCL chuan Lunglei District chhunga an kawng enkawl laia lei min thlen nasat theihna hmun 13 an theh luh zingah Bualte dai hi a tel tih tar langin, Headquarters lam aṭanga mi thiam zawkte’n an rawn zir chian tur thu an sawi a. Lei minna lai leh a chhak lam leilung nihphung zir chian nana laboratory-a endik turin Geology & Mining leh BRNIPL te’n kar leh Thawhṭanni ral hmain lei sample lain, kar khat chhungin a endikna result DC-ah theh lut se, tih a ni.

Bualte leh Ṭhualṭhu inkar hi August ni 2, 2025 (Inrinni) khan nasa taka minin, lei minin kawngpui a tihpin avangin lirthei leh khualzin eng emaw zat an tang a. He lai kawng siam hna thawktu – BRN Infrastructure Pvt Ltd te’n lei min then fai hna hi thawk nghalin, August ni 4 tlai lamah lirthei te deuhho (light motor vehicle – LMV) ṭhenkhat kal tlangtir a ni a. Lei a tlak belh leh ṭhin avangin leh zan lamah hna thawh ngam a nih loh avangin, a khat tawkin kawng hi a pingin, a tlang leh ṭhin a. nimin thleng khan ni tin company lam chuan lei min then fai hna hi thawkin, fimkhur takin lirtheite pawh a tahtawla chhuahtir ṭhin an ni a. Kawng chhakah lei min mai thei eng emaw zat a la inchhek avangin fimkhur taka then fai leh pal tlang a ngai a. Lirthei tangkhang pawh eng emaw zat a la awm a, nizana lei rawn tla hlek chu tukin Dar 7 : 56am atangin a tlang leh tawh a, engemaw fe te anih loh chuan chawhma lam ah motor tangte hi chhuah zawh vek hman beisei a ni.