ZOEN 13th August 2025 : Nimina uar leh zuala HIV laka invenna beihpui thlakna Intensified IEC Campaign on HIV thawh hnihna leh HIV Test Drive Campaign a hawnnaah Mizoram Chief Minister Pu Lalduhoma chuan thu sawiin ruihhlo nghei thei ngang lo pawhin HIV leh zel kai lo tura inven a tul takzet a a ni ti a, Hmeichhe inzuar dawr lo thei lo te pawhin HIV laka invenna hmang zel se a tiin, HIV kai leh kai lo inenna test uar ni se a ti bawk a, mahni dinhmun hriat ran chu mahni tan leh midangte tan a tha a ni, a ti.
Chief Minister chuan Intensified IEC Campaign neihna tur khawtlang hruaitute chu, thawktute lo thawhpui turin a sawm a. YMA hruaitute pawh khawhar inah te, YMA programme-ah te tam zawka lo sawi tura ngenin, he natna a darh chhan ber pahnih sex leh ruihhlo te hi YMA member-te tih atana mawi lo, Kristian thalaiten an tih ve miah loh tur thil ve ve an ni, a ti.
Mizoram chu HIV/AIDS invên dan hre zau pâwl tak ni a târlan a ni chungin HIV kai an tam viau lawi si avangin Awareness nei tha, zawm tha si lo state angin a lang mek, hei vang hian hmalakna awmze nei, zawm hlawh lehzual awareness pek dan tur ngaihtuah chhuah a tul a ti bawk.
Health and Family Welfare Minister Pi Lalrinpuii pawhin thusawiin HIV hrik chuan mi nawlpui a luhchilh tawh a ti a, mi nun pelhe leh hum sual daite chauh vei tura dah bik a hun tawh loh thu sawiin HIV natna veite chuan midangte anga an damchhung hun hahdam tak leh hlim taka an hman ve theih nan hnualsuat mai lova mi pangngai anga en an mamawh tih a sawi bawk.
He inkhawma Mizoram State Aids Control Society Project Director Dr. Jane R Ralte tarlan danin, kum 1990 atanga 2025 thlengin Mizoramah HIV positive mi 32,994 hmuhchhuah a ni tawh a, kum kalta 2024 April thla atanga kumin June thla inkarah Kum 1990 atanga vawiin thlenga Mizorama HIV kai tawh hi mi 32,994 an awm a. Kum 2024-25 chhunga kai thar hi mi 2471 niin an zinga 1602 hi mipa an ni a, hmeichhia 869 an awm a, an zinga 140 hi raipuar an ni. A kai zawng zawng 97% hi chu inven theih a nih thu a tarlang. Mizoram chu India rama HIV/AIDS venna leh enkawlna lam thawk tha ber 5 na a nih mek thu a tarlang bawk.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni