ZOEN 8th August 2025 : Vawiin khan Lunglei South bialtu MLA Pu Lalramliana Papuia chuan a bial chhung Bualte khaw bul lei minna hmun chu tlawhin, khualzin tangkhangte ei in atan Bualte leh Ṭhualṭhu khawtlang kutah alu ip khat ve ve a hlan a. Pathianni khan he’ng khaw 2 te kutah hian khualzin lei min avanga tangkhangte pualin pawisa fai ₹10,000 (sing khat) ve ve a hlan tawh bawk.
Pu Lalramliana Papuia chuan Bualte leh Ṭhualṭhu khawtlang hruaitute’n nu leh pa chan changa khualzin tangkhangte ei in an lo siamsak ṭhin leh a ṭul ang anga an lo buaipui ṭhin chu lawmawm a tih thu sawiin, kohhran, pawl leh mimal tlawmngai, mi inphalte’n ṭanpuina an pek chungchangah bialtu a nih angin lawm thu a sawi a. Khuarel thil avanga harsatna awm chu pawi a tih thu sawiin, sawrkar pawhin khualzin tangkhangte’n harsatna an tawh loh nan leh ṭha taka kawng a tlang theih nan theih tawpin hma a la tih a sawi a. He lai kawng ping a tlang theih nan leh mipui harsatna sut kian a nih theih nana thawktu leh hma latu zawng zawng chungah lawm thu a sawi.
Pu Lalramliana Papuia chuan lei minna hmuna hna thawh dan chu a hmunah enin, DDMA aṭanga viltu leh police duty te, kawng enkawltu NHIDCL hotute leh hna thawktu BRNIPL Company te nen kawng dinhmun an sawi ho va. Khawtlang hruaitu – Village Council leh YMA te nen an hma lak dan leh thil ṭul hrang hrang an sawi ho bawk a. Khawtlang hruaitute chuan bialtu MLA-in kawng hrang hranga a ngaihsak ṭhin chu thlamuanthlak an tih thu sawiin, ei leh in an siamna atana an senso angte pawh a buaipuina azarah sawrkar aṭanga an hmuh let tawh thu an sawi.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni