MPWD leh CYMA ten thawhhona thuthlung an ziak

ZOEN 8th August 2025 : Vawiin chawhnu khan Mizoram kawngpuite a lo that zawk theihna turin Engineer-in-Chief, PWD Conference Hall, Tuikhuahtlang ah Mizoram PWD leh Central YMA te chuan thawhhona thuthlung (MoU 2025) an ziak. MPWD leh CYMA te hian 14th June 2018 leh 14 July 2022 khan thawhhona thuthlung hi an lo ziak tawh a, a vawi 3 nan MoU 2025 hi vawiin khan an ziak leh a ni.


Vawiin a thawhhona thuthlung ziahah hian Central YMA aiawhin Pu Lalhmachhuana, President leh Prof. Malsawmliana, General Secretary te’n hming an ziak a, PWD aiawhin Er. H. Zoramliana, Engineer-in-Chief leh Er. C. Lalthlamuani, Chief Engineer (Planning) ten hming an ziak a ni. He MOU thar ziah hian 08th August 2025 atanga kum 3 chhung (August 2028 thleng) a huam ang.


Mizoram PWD leh CYMA thawhhona tur thuthlung tlangpui te chu:

• Hnathawh tur lian zual deuhah bul tan a nih hma in a bialtu PWD hotute ruahmanna in hnathawhna tur huamchhunga YMA Branch/ Group/ Sub- Hqrs. hruaitute nen project nihphung, hnathawh dan tur leh tul dangte inhrilhfianna neih thin nise.
• Project intanna leh tawpna, a paltlang kawng/ khua ah te detailed information PWD in a duan angin Informatory Board, PWD senso in tar thin tur a ni a, a venhim hi YMA mawh a ni ang.
• Hnathawh laiin, hun remchangah PWD leh YMA hruaitu ten Joint Inspection an nei ho ang a, a tul dan a zirin Bialtu MLA/ Sawrkar hotu dang leh NGO dangte pawh sawm theih a ni ang.
• Hna thalo a awm chuan, YMA-in a mala hma la mai lovin, bialtu EE/SDO te nen sawiho a nih hnuah Department-in Contractor-te hi instruction pek thin tur a ni ang.
• Kawng siam mek tikhaihlak zawnga khawsa leh harsatna siam an awmin, YMA leh Department-te inrawnin a tul angin hmalak a ni ang.
• PWD kawngpui leh side drain te a him theih na’n a tul angin Branch YMA in an huam chhungah Guideline for road safety chungchanga zirtirna an pe thin ang.

Thawhhona thuthlung thar hi hlawhtling taka kalpui a nih theihna’n PWD hotute leh Central YMA te’n anmahni ve veah inhrilhfiahna hun siamin Joint Monitoring Group siam a ni ang a, kum khatah tum tum 2 tal thawhhona chungchanga hmalakna thlirho ni se, tih a ni bawk.