Nau pai lama harsatna neite damdawi thiamna hmanga nau pai tirna centre neih tuma hmalak mek a ni ti.

Health and Family Welfare Minister Pi Lalrinpuii chuan MUHCS hnuaiah Zoram Medical College & Hospital (ZMC&H) chu thuam chak mek a ni a, nau pai lama harsatna neite damdawi thiamna hmanga nau pai tirna, In Vitro Fertilization (IVF) centre neih tuma hmalak mek a ni ti.
Vawiina Zoram Medical College & Hospital (ZMC&H), Falkawn din champha vawi 7-naah Pi Lalrinpuii chuan ZMC&H chu Mizoram Universal Health Care Scheme (MUHCS) hnuaia cashless a damlo enkawl nasa ber zinga mi a ni chu lawmawm a tih thu a sawi a, kumin April ni 1 atanga MUHCS kalpui a nih hnuah ZMC&H chu thuamchak leh tihchangtlun chhoh mek a ni a ti a, sorkar chuan nurse leh staff engemawzat a pek belh tawh a, cabin 30 leh ICU 13 a pek belh bawk a, operation theatre (OT) 3 an siam leh dawn thu sawiin, IVF centre neih tumin ZMC&H-ah hian hma lak chhoh mek a ni tih a sawi bawk.
Mizoram Health Care Society CEO ah Dr Lalhriatzualin Ralte, IAS chu dah thar niin, LESDE Special Secy hna bakah Health Care Society CEO hna hi a chelh kawp dawn a ni.
ZMC & H Founding Day lawmnaah hian ZMC&H Director, Dr. John Zohmingthanga’n thusawiin, kum 2018 khan ZMC&H chu khum 150 bawr vela bul tana nih thu sawiin, kum 2024 ah khum 420 awmin, sawrkar hmalakna a MUHCS kalpui a nih hnu hian khum 85 awm belhin tunah chuan khum 505 a awm tawh thu a sawi. Heng bakah hian ICU leh Special Ward hawn belh tum a nih thu a sawi bawk a ni.
ZMC & H Founding Day ah hian MBBS Intern Hostel thar khum 60 awmna hawn nghal a ni a, tun dinhmnah ZMC&H ah hian MBBS zirlai 394 awm mekin, Internship ti mek 98 awmin, ZMC&H atang hian Batch hnih (2018 & 2019 Batch) atangin MBBS zir chhuak 189 an awm tawh a ni.
Vawiin hun hmanah hian MBBS zo thar ti tha zualte hnenah lawmpuina certificate leh citation hlan a ni.
1st: Alex Lalruatkima
2nd: Esther Lalhriatpuii
3rd: Lalmalsawmi Hauhulh