NHIDCL ten Kawnpui leh Sairang road ah One Way a motor tlan tir an in huam tawh

National Highway 06 Kawnpui leh Sairang inkar thawm that hna thawh mekah a chhe nasa lai ber leh khawih harsa lai ber ni a ngaih Zoram Mega Food Park, Khamrang bul kawngpui hnawhkhah hna chu vawiin khan zawh hman beisei a ni.
Sorkar thuchhuah tarlan danin, helai kawng chhe lai hi metre 100 vel niin vawiin chawhnu dar 2:00 thleng khan metre 80 chu boulder a hnawhkhah a ni tawh a, Excavator 2, Vibratory Roller 1 leh Grader 1 hmanga hna thawh a ni a, kawngpui sir tawn tawnah tuihawk luankawr tha taka hai a ni bawk dawn a ni.
Kawngpui thawm that hna thawktu NHIDCL ten Kawnpui leh Sairang road ah One Way a motor tlan tir an in huam tawh ang in, zanin dar 6:00 atangin nitin mamawh phur lirthei bak ah lirthei lianchi ke 10 nei te thlengin chhuah an ni ang a, hun a la awm chuan ke 12 nei pawh chhuah an ni leh ang.
Lirtheia eizawng pawl hrang hrang hruaitu zinga mi, MTDA President Pu H. Laldingliana chuan sorkarin in lirthei a kal theih an tih chuan an member te kal duh an awm chuan an dang lo tih a sawi a, sorkar hnenah pawh an duhdan hrilhin lirthei rit tak tak ten kawng an rap khuar leh dawn avangin kawng khuar hnawhpinna tur lung leh lirthei tangte nawrchhuaktu tur inchhawp sa se an duh tih an lo sawi tawh a ti a ni.