Vawiin khan Sairang leh Bairabi inkar rel kawng hawn a ni

Pu Narendra Modi chuan, Mizoram chu India ram hmasawnna atana kawng pawimawh tak a ni a ti a, vawiin atanga chuan India railway map-ah Mizoram a lang tawh dawn a ni, a ti.

Prime Minister chuan, hun rei tak atanga an hmathlir Sairang leh Bairabi rel kawng chu a takin a hlawhtling ta a, hemi hlawhtlinna atana tha thawhtute chungah ka lawm em em a, hei hi relkawng ringawt a ni lo a, hei hi hmasawnna bultanna a ni a, Mizo mipuite tana kawng hawnsaktu, eizawnna hmuhsaktu, kut hnathawktute tana thlai thar hralhna tur kawng awlsam, khualzin tan kawng awlsam zawk a siam dawn a ni, a ti.

Pu Narendra Modi-a chuan kum 11 chhungin hmarchhak bial hmasawnna tur atan theihtawp an chhuah thin tih a sawi a, kum rei tak chhung chu inkalpawhna leh inbiakpawhna kawng a awlsam lo ṭhin tih sawiin hemi kawngah hian hun rei tak Mizoram chuan hmathlir nei mah se hmasawnna a awm lo thin a ti a, tunah chuan an sawrkar hnuaiah hmasawnna a awm tih sawiin hmarchhak bial hmasawnna chu ram hmasawnna a ni tih a sawi bawk a ni.

Mizoram hi Act East Policy tan kawng pawimawh tak niin economic corridor pawimawh tak a ni a, KMMTTP pawh kawng pawimawh tak a ni tih sawiin Prime Minister chuan Mizoram chu rampawn te nen insumdawn tawnnaah hmun pawimawh tak a ni dawn tih a sawi.

PM hian hmarchhak bial chu sumdawnna bultan mek te tan hmun pawimawh tak a ni chho mek tih sawiin hetah hian ṭhalai tam takin hna an thawk a ti a, India hi khawvelah hmun dang nena insumdawn tawnna ah hma a sawn zel tih sawiin infiamna leh kawng hrang hrangah hma a sawn tih a sawi.

Sairang leh Baibari inkar rel kawng hi KM 51.38 a thui niin cheng vaibelchhe 8071 senga siam a ni a, Prime Minister hian Mizorama rel service thar pathum: Aizawl – Delhi Rajdhani Express (Anand Vihar Terminal), Aizawl – Kolkata Express leh Aizawl – Guwahati Express te a vailiam bawk.

Rel kawng bakah hian cheng vaibelchhe 33 senga sak Kawrthaha Residential School leh vaibelchhe 24 senga sak Tlangnuam Eklavya Model Residential School chu a hawng bawk a.

Cheng vaibelchhe 500 senna tur Aizawl Western Side Bypass Road; vaibelchhe 226 senga thawh tur Mualkhanga 30 Tounsand Metric Tons Per Annum Gas Bottling Plant; vaibelchhe 70 senga thawh tur Chhimtuipui (Tuipui Ferry) lei (Bridge); vaibelchhe 45 senga thawh tur Thenzawl – Sialsuk kawngpui; vaibelchhe 32 senga laih tur Khankawn – Rongura Hmun kawngpui leh vaibelchhe 12 senga thawh tur Tuikuala Khelo Multipurpose Hall te lungphum a phum bawk a ni.