FCAA Act 2023 Assembly in a pawm duhloh lantirna punkhawm huaihawt a ni dawn.

Inrinni kalta khan JCM buatsaihin Forest Conservation Amendment Act, 2023 (FCAA, 2023) Mizoram Legislative Assembly August ni 27-a thukhawm in a nih ang anga Mizorama hman theih tura an lo pawm (adopt) chu tha an tih loh thu leh pawmpui theih ni lova an hriat avangin , hemi chungchanga inrawnkhawmna a buatsaih a. Hetah hian heng NGO, Political Party leh Pawl hrang hrang an sawm zingah Central YMA, MHIP Hqrs, MPCC, MNF, PC, Mizoram Transformation Movement (MTM), CESJ, Mizoram First, CATAJ, ZORO, Mizoram Environment NGO te an tel a, hetah hian Mizoram assembly-in FCAA 2023 a lo pawm tak chu ram leh hnam, thlahte leh chhuan lokal zel turte tana thil him lo, tha lo leh pawi tak, chhiat hlenna hial thlen thei ni a an hriat thu an sawi a ni.

He inkhawmnaah hian Thutlukna siamin chuan FCAA 2023 hi a nih ang ang a pawm hi tha an tih loh thu leh Mizoram Legislative Assembly Session August ni 27, thukhawm in a lo pawmchu sut leh ni sela, a tul angin Assembly Special Session pawh ko ngei rawh se, an ti a. He thil hi assembly vekin a sut leh theihna turin hmalakna tur hrang hrang duangin Mipui punkhawm, Kawng zawh leh a tul angin Bandh emaw huaihawt ni se an ti a. Chu bakah Online leh Off-line Signature Campaign buatsaih an rel a. A tul anga Mizo mipuite hrilhfiah a Mizoram khaw hrang hranga vantlang inkhawm huaihawt an rel a. Kalkhawm pawl hrang hrangte chuan an thutluknate hi a hlawhtlin ngei theihna turin chak taka hmalak zel a nih theih na’n JCM hmalakna an thlawp tlat thu an puang bawk a ni.