Zotlang tlangval Silaia kah chu ICU dah a ni

August  29 zana Aizawl, Bawngkawna Rochingpuia an silaia a kah Lalhriatrenga Siakeng chu a that chhoh viau laiin tukin khan thawhah a neih avangin ICU-ah dah luh a ni.

Lalhriatrenga hi tukin mai khan a thawk a rawn hah thut avangin ICU-ah dah luh a nih thu leh ventilator te pawh an hman tir thu Zotlang khawtlang hruaitute chuan an sawi a ni.

Lalhriatrenga Siakeng kaptu Rochhingpuia chu tun thla ni 12-ah court hmaah inlan tur nia an hriat thu leh hemi chungchangah hian tunhnaia Bawngkawn branch YMA nena thuchhuah intawm an siam chu an tanna a nih reng thu an sawi a ni.

 

Ningani kalta khan Bawngkawn leh Zotlang branch YMA te chuan thuchhuah intawm siamin Rochhingpuia chu a thubuai ngaihtuah a nih chhungin bail hmanga jail a chhuahsan an remtih loh thu an sawi a. An chhungkuaa Burma atanga Champhaia lo pem, ruihhlo tawlhruk avanga Champhaia an awmna veng pawhin pem lehkha pe duh lova an hnawh chhuah an nih thu an sawi a. Ruihhlo tawlh ruk thin thubuai ațang hian engtia zalen ta mai nge a nih an hriatthiam loh thu leh hetianga a rawn zalen leh mai a nih chuan a chungah engpawh thleng se mawh an phurh dawn loh thu an sawi a ni.