Kawngchhiat chhan chu mawhphurhna inchuh vang a ni tih mipuiten an hre tlang vek tawh-TBC Lalvenchhunga

Advisor to CM (Finance) Pu TBC Lalvenchhunga’n Mizoram chak lakluhna kawng chhia ah ZPM chuan mawhphurhna la in, siamthat a nih theih nan theihtawp a chhuah mek a, kumdangah chuan hetiang hi a thlen tawh loh an beisei tih a sawi.
Akashvani Aizawl zawhna chhangin, Advisor to CM (Finance) leh Aizawl West I Bialtu MLA Pu TBC Lalvenchhunga chuan Kawngchhiat chhan chu mawhphurhna inchuh vang a ni tih mipuiten an hre tlang vek tawh a ti a. Kawngchhia chu Mizoram in a tawrh tak avangin Mizoram sorkar chuan a enkawl kawng ni tawh lo mahse theihtawpin hma a la a, Chief Minister Pu Lalduhoma pawhin a siamthat theih nan sum a sanction a, PWD Minister hovin a department chuan a hmunah an riahchilh a, siam tha turin theihtawp an chhuah mek a ti a. Lirthei Ke 14/16 tih loh chu lirthei tang an awm mumal lova, harsatna lian tak a awm tawh lo an beisei tih a sawi.
Pu TBC a chuan lirtheia eizawngten sorkar an thawhpui ṭha a, kawng siam a nih theih nan lirthei tlan loh an remti chu lawmawm a tih thu a sawi a, lirthei tlan chawlh chhung hian kawng chu ṭha taka siam hman a nih a beisei tih sawiin, ZPM chuan mipui tan theihtawp a chhuah a, mawhphurhna pawh midanga beng per lovin, siamthat a nih theih nan theihtawpin a contractor te a thawhpui mek a, kumdangah chuan hetiang hi a thlen tawh loh an beisei tih a sawi.
Zawhna chhangin Pu TBC-a chuan ṭhal laiin kawng siam lo tawp an ni lo a ti a, kumin January thla ah NHIDCL enkawl tura tih ni mah se kawng an siam nghal loh avangin Mizoram sorkar chuan theihtawpin a thawm tha a, tuna lirthei tanna lai ber Mega Food Park phei chu an metal vek a, duhthu a sam lo deuh a, Fur a lo thlenin bungraw rit tak tak phur lirthei lo lut te chu kawng chuan a dawl zo lo a ti a, tunah cheng vbc 50 in an sub-contract a engemawchen chu an siamthat theih tawh a beisei tih a sawi.
Hetihlai hian Eptu Party ten ZPM kaihhruai sorkar inthlahdah avanga Mizoram chak lakluhna kawngpui chhia chu Mizoram ei leh bar zawnna kawngah a pawi hle a, thla 7 chhungin GST pawh a tlahniam zawngin a la kal char char tih an sawi.
Akashvani News Aizawl zawhna chhangin MNF Vice Chairman, Publicity Board MNF J Malsawmzuala Vanchhawng chuan tuna kawng chhe zual, lirthei tam tak a tan vanga mipuiin harsatna namen lo an tawhna chhan lian ber Kawnpui-New Khamrang chu nikum lamah pawh mipuiten nasa taka an tawrh chhan a lo ni tawh tih a sawi bawk.
Congress Treasurer Dr Lalmalsawma Nghaka pawhin tunlai kawngchhia chu sumdawngte bakah lirtheia eizawng leh mipui nawlpuiin an tuar tawh hle a ti a. Mizoram sorkar chuan ṭhal lai khan kawngpui pawimawh chu ngaihtuah ni se tun ang hian kan buai a rin lo thu a sawi a ni.