Eptu Party ten Mizoram chak lakluhna kawngpui chhia chu Sorkar inthlahdah vang an ti

ZPM kaihhruai sorkar inthlahdah avanga Mizoram chak lakluhna kawngpui chhia chu Mizoram ei leh bar zawnna a nghawng nasat thu eptu party te chuan sawiin, thla 7 chhungin GST pawh a tlahniam zawngin a la kal char char tih an sawi.
Pu J Malsawmzuala Vanchhawng, MNF Publicity Board Vice Chairman chuan kumin ang reng renga kawng chhiat nasat țum leh tiang anga mipuite tawrh nasa hi a la thleng ngai lo a ti a, tuna kawng chhe zual, lirthei tam tak a tan vanga mipuiin harsatna namen lo an tawhna chhan lian ber Kawnpui-New Khamrang chu nikum lamah pawh mipuiten nasa taka an tawrh chhan a lo ni tawh tih sawiin, kum 2024 September thlaah sorkarin Contractor bantirin, a security pawh cheng nuai 35.37 lai a chhuhsak a, amaherawhchu khati khawpa kawng chhe nasa tawh si kha, contractor kut ațanga laksak anih hnuah pawh țhal chhung zawngin engmah ti mumal lovin Sorkar-in a thlir a, a mutthluk san chhunzawm leh avangin kuminah harsatna namen lo state in a tawk nawn leh mek a ni a ti.
ZPM sorkarin kawng siamna tur bika chhiah a lak Road Maintenance Cess tling khawm pawh June thla thleng khan cheng vbc 25 nuai 54 sing 5 & 7,771 zet a tling tawh tih sawiin sum nei nei reng chung si leh kawng a chhe nasa hle dawn tih hre lawk reng chung sia sorkarin mipuite tawrhna a thlentir tho mai chu hriatthiam harsa a tih thu a sawi a, Mizoram economy a hniam phah a, thla 7 chhung a zawn zatin Mizoram GST lakkhawm chu a tla hniam a, sumdawngten bungrua an ti thleng mumal thei lo a, bawnghnute a vang a, nitin mamawh indaih lohna a thleng mek a, in sakna bungrua a awm loh avangin inhlawhfa tam tak, thawh tur nei lovin an awm a, hei hian state economy tlahniam mek nasa takin a belhchhah mek a ti a.
Hetihlaia sorkar hotu țhenkhatin mawhpuh tur dang a dap kual phei hi chu mipui zah lohna a tling a, a vanduaithlak tak zet a ni, a ti.
Congress Treasurer Dr Lalmalsawma Nghaka pawhin tunlai kawngchhia chu sumdawngte bakah lirtheia eizawng leh mipui nawlpuiin an tuar tawh hle a ti a. Hei hian Mizoram economy a nghawng lo thei lo tih sawiin, thla 8 dawn lai chu Mizoram GST lakkhawm chu a tlahniam chak hle a, thla thenkhatah phei chuan zaa 30 dawn ten a tlahniam tih sawiin, hei hian mipui a nghawng hle a ti.
Mizoram sorkar chuan ṭhal lai khan kawngpui pawimawh hi ngaihtuah ni se tun ang hian an buai a rin lo thu a sawi a, Mizoram hmun dang Mamit, Khawhruhlian leh Thenzawl atanga Lunglei panna kawngah te pawh lirthei tan tlan a hrehawm hle tih sawiin, hei vang hian thil phur man a to phah vek a, hei hian mipui nawlpuite chu a nghawng ber thin tih sorkar chuan hre chiang se a duh tih a sawi.
BJP Mizoram Joint Treasurer F Lalremsangi chuan nikum lamah Cyclone Remal vanga Mizoram hmun hrang hrang inkalpawh thei lova an awm avangin kuminah chuan Mizoram sorkar chuan inpuahchahna tha tak nen furpui a hmachhawn an beisei laiin, Mizoram chaw lakluhna kawng ber, Kawnpui to Khamrang kawng, Silchar atanga Mizorama lirthei luhna chhe lutuk leh inpuhmawhna thlengte chu pawi an ti hle tih a sawi a, Mizorama hmasawnna ruhrel te chu sorkar laipui atanga lut ni mah se, a enkawl hna chu Mizoram sorkar tihtur pawimawh tak a ni a ti a, vawiin thlenga kawngpui tha taka siam a la ni lo chu zahthlak a tih thu a sawi. Mizoram a la intodelh loh em avangin mipuite zingah ei leh in tur nei mumal tawh lo an awm a nih chuan a tanpui turin BJP a inpeih reng a ti a, ram hruaitu atana MLA thlan tlin te bakah party hrang hrangte chu sorkarna siam thlahlel ringawt lovin mipui tana ding tlat a, kawngpui pawimawh te a that theih nan tangruala thawk ho tura a duh thu a sawi a ni.