Sorkar laipuiin GST a lak thenkhat a tihniam dawn

ZOEN 4th Sept. 2025 : Sawrkar laipui chuan GST a lakna thenkhat a tihniam a. He GST rate thar hi tun thla ni 22 atanga hman tan tur a ni.
Union Finance Minister Nirmala Sitharaman chuan GST lak dan thar chungchang sawiin mi naran leh middle class te nitin mamawh leinaah zaa 18 emaw zaa 12 emaw zaa 5 emawa tihhniam an rel a ti a. Pi Sitharaman-i chuan heng hair oil te, inbualna sahbawn, shampoo, toothbrush, toothpaste, bicycle, tableware, choka bungrua leh inchhung mamawh hrang hrangteah te GST zaa 5 chauh lak a ni tawh dawn a ti a. Bawnghnute, chena leh paneer ah te, namkeen, bhujia, sauce, pasta, noodles, chocolate, coffee, preserved meat,cornflake, butter leh ghee ah te zaa 5 chauh lak a ni tawh dawn bawk a ti.
Heng bakah hian GST tihhniam langsar zingah car te chi ho leh lirthei ke hnih nei 350cc chin ah GST zaa 28 lak thin chu zaa 18 a tihhniam a ni a. Bus, truck leh ambulance ah te zaa 28 atangin zaa 18 ah tihniam a ni bawk a. Auto part zawng zawngah zaa 18 lak a ni ang a. Three wheeler ah zaa 28 atangin zaa 18 ah a tlahniam dawn bawk a ni.
Damlo enkawlna damdawi thenkhat natna khirkhan enkawlna damdawi chi 33 ah te zaa 12 lak thin chu lak a ni tawh dawn lo a. Cancer, natna khirkhan leh chronic disease enkawlna damdawi chi 3 ah zaa 5 lak thin chu tihtawp a ni bawk a. Heng bakah hian damdawi hrang hrangah zaa 12 lak thin chu zaa 5 ah tihhniam a ni bawk a ni.
GST Council meeting vawi 56 na hi New Delhi ah neih mek a ni a. Union Finance Minister Nirmala Sitharaman chuan he inhmuhkhawm hi kaihruaiin GST kalphung siamthat tur leh tihawlsam dan tur hrang hrang an ngaihtuah a. He hunah hian Union Minister of State for Finance Pankaj Chaudhary bakah Delhi, Goa, Haryana, Jammu and Kashmir, Meghalaya leh Odisha Chief Minister te an tel a. Hei bakah hian Arunachal Pradesh, Bihar, Madhya Pradesh leh Telangana Deputy Chief Minister-te, Manipur Governor bakah State leh UT Finance Minister engemawzat an tel bawk a ni.
GST Council ah hian member a nih angin Dr. Vanlalthlana, Minister, Taxation, a tel a. Mimister hi Pu HK. Lalhawngliana, Commissioner of State Tax in a ṭawiawm a ni.