ZOEN 1st September 2025 : Myanmar atanga Mizorama rawn raltlan mit-naute leh kut ze thla lak hna chu a kal chak thei lo hle a, thla khat chhungin raltlan 33,300 chuang zinga 6,370 chauh an mit-naute leh kutze thla lak an ni.
Biometric enrolment hi duh angin district hrang hrangah kalpui chak theih a ni lova, Home Department hotute sawi danin an harsatna tawh lian ber chu ‘Foreigners Identification Portal & Biometric Enrolment’ (FIP&BE) software hmanga hna an thawhna khawl hman chiangkuang lo leh internet signal tha tawk lote a ni a. Hei hian an hna a tithuanawp nasa hle niin district hrang hrang official-te chuan an sawi a. Relief camp-a awmte a hlawma endik an awlsam rualin an fate hmun danga lehkha zira awm an lo awm ve bawk avangin an biometric data lak kim a harsa an tih bakah chhungte leh thiante belte bakah mi in luaha awm hmun karkir tak taka awmte chu khawtlang hruaitute tanpuina an hmu chungin hun a duh hle niin an sawi bawk.
Ministry of home affairs duhdana biometric enrolment chauh kalpui tura ngaih a nih lai-in biographic data pawh lak khawm nghal a ni a. Raltlan hming, nu leh pa, a lokalna khua, Myanmar a a awm lai leh Mizoramah enge a thawh tihte lak zel a ni. Tun hma khan mimal chanchin chhinchhiah hna hi kalpui chhuah vek a ni tawh a, temporary identity card pawh pek chhuah deuh vek an ni tawh chungin an dinhmun hi a danglam reng avangin mimal chanchin chhinchhiah hi thar thawh leh a nih thu home department hotute chuan an sawi a ni.
Myanmar raltlan bakah hian Bangladesh Chittagon Hill Tracts atanga raltlan hi mi 3,000 tling lo an awma ngaih a ni a. Lawngtlai district-ah Bangladesh raltlan 2,000 chuang an awm a, Thenzawl khawpui-ah 299 awmin Lunglei district-ah Khawmawi khua-ah mi 63 an awm mek bawk a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni