Myanmar atang ruihhlo lo lut za zela sawm chauh man a ni

Mizoram sorkarin naktuk atanga ruihhlo do beihpui a thlak tur atana Myanmar ramri a ruihhlo tawlhna enfiaha kalte chu Aizawlah an lokir leh tawh a. Champhai district-a Myanmar ramri a awm khaw hrang hrang han tlawhtu Police hotute leh central YMA hruaitute Champhai Sub Headquarters YMA hruaitute nena an inkawmkhawmna-ah he thu hi sawiin IGP chuan ruihhlo chu nasa zawka do a tul thu a sawi a. Champhai chu ruihhlo tawlhna luhka lian ber a nih thu sawiin nikum chhunga ruihhlo thubuai an ziah luh 370 zinga 170 chu Champhai Police ziah luh a nih thu leh kumin January atanga August ni 10 thlenga thubuai 150 chuang ziahluh zing za zela 50 aia tam chu Champhai District-a ziah luh a nih thu a sawi a. Champhai mipui leh khawtlang hruaitute chu theihtawp chhuahpui turin a sawm a ni.

 

Mizoram-a ruihhlo lo lut hian Khawvel hmun hrang hrang a dengchhuak tawh tih sawiin ramria venhim hna thawktu Assam Rifles-te chu ramri-ah tak taka an duty loh avangin duh duha inkal pawh theih a ni a, hei hian ruihhlo venna kawngah harsatna a siam thu a sawi a. Pu H. Ramthlengliana chuan ruihhlo lo lut tur venna kawnga khawtlang hruaitute thawhpuia, an tha tichak turin Police 32 tirhchhuah an nih tur thu a sawi.

 

Central YMA Asst. Secretary Pu Fabian Lalfakawma pawhin thu sawiin ruihhlo avangin Mizoram chu a la chhe vek lo a, ruihhlo a inhnamhnawih lo thalai tam tak la awm mah se, Mizoram hian chhiat lam a pan zel tih erawh hriat a tul thu a sawi.

 

He hunah hian tlawmngai pawl hrang hrang aiawhte’n thu an sawi ve bak ah, Myanmar atanga ruihhlo rawn lut venna beihpuithlakna – Special Operation hi September thla atanga December ni 31 thleng kalpui tura ruahmanna siam a ni a, IGP Pu H. Ramthlengliana ho hian Champhai District chhunga ramri hnaih khuate tunkar chhung khan an tlawh kual a, ruihhlo lo lut tur venna kawnga hmalak dan tur khawtlang hruaitute nen an sawi ho ṭhin a ni.