ZOEN 31st August 2025 : Kar kalta zirtawpni 29 August zana Bawngkawn venga a insualpui kaptu Rochhingpuia te chhungkua chuan an chenna Bawngkawn veng YMA in an hriattir angin nizan 30 August khan an in luah an chhuahsan.
Bawngkawn YMA hruaitute chuan Rochhingpuia te chhungkua hi nizan zanlai thleng an veng chhuahsan tura hun an pek angin nizan la la khan an riak chhuak nghal tih an sawi a. An bungrua erawh nizana an thiar chhuah zawh hman loh avangin vawiin khan an thiar zo a, an chenna thin in chabi pawh YMA in an kawl tawh thu an sawi bawk a ni. Bawngkawn YMA hruaitute chuan Rochhingpuia’n a kah Lalhriatrenga Siakeng chu a dinhmun a ngaihtuahawm loha an hriat thu sawiin ICU-a la awm ni mah se amah pawh a tawng peih thu an sawi bawk a ni.
Tarlan tawh angin an in tihbuai dan hi thudawn danin, Bawngkawn-a KFC outlet bulah Rochhingpuia car leh Lalhriatrenga Siakeng Bike hi an in ti palh nia sawi a ni a, hemi avang hian intibuaiin Rochhingpuia hian a car aṭangin pistol la chhuakin Lalhriatrenga hi a kap ta a ni.
Hemi kaihhnawihah hian, Bawngkawn PS Case No. 438/25 dated 29.09.2025 under Section 109(1)/118(2) BNS read with Section 27 of the Arms Act hmangin thubuai ziahluh nghal a ni a, Rochhingpuia hi tunah Central Jail ah dah nghal a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni