ZOEN 29th August 2025 : Non-Government Hospital Association of Mizoram (NGHAM) chuan Health Minister Pi Lalrinpuii’n private damdawi in ten MUHCS an zawm loh chhan chu sum chawi tur pe lova eninkawl- cashless an duh loh vang nia a sawi chu thu dik lo a ni tih an sawi.
Health Minister Pi Lalrinpuii`n Assembly Session neih zawh taka zawhna leh chhanna huna private damdawi in ten MUHCS an zawm loh chhan chu cashless an duh loh vang a nih thu a sawi a. Hetihlai hian NGHAM secretary Hmingtea Chhangte chuan NGHAM chuan MUHCS hnuaia cashless system an dodal ngai lo tih sawiin, sorkar hmasa hunlai khan cheng vbc 4 chuang an lo hloh tawh avangin private damdawi te chuan financial security rintlak tak an duh thung a ti a, NGHAM in MUHCS chungchanga an duhdan state sorkar hnena an thlen hnuhnun ber tum, June ni 30 khan private damdawiin ten cashless system an hmang dawn a nih chuan damlo te chuan MUHCS package rate-in a huam theih bak te chu an pek a ngai dawn tih an sawi a, sorkarin he rawtna hi a remti lo a nih chuan NGHAM member damdawi in te rate an hman lai theuh chu hman phalsak turin an ngen a, hetihlai hian state sorkar chuan tun thlengin NGHAM rawtnate chu an la chhang lo a ni a ti.
Hei bakah hian NGHAM member hospital te tana financial security dah chu hospital pakhat chauh pawhin hman tur a nei tawh lo a nih chuan automatic-in NGHAM member hospital te chu Reimbursement System-ah an lut lailawk ang a, ni 30 chhunga financial security dah khah leh a nih chuan cashless in an kal chhunzawm anga, hetihlai hian huntiam chhunga financial security chu dah khah leh a nih loh chuan NGHAM member hospital te chu Reimbursement System-ah an awm hlen tawh turin sorkar hnenah rawtna an thlen bawk a ni.
Enlightener of Mizo
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni