Mizoram State University chu Aizawlah bawk dah tumna a awm avangin Lunglei mipuite chuan Lungleiah ngei an ti a, chutiangin Chhim lama Opposition MLA Lawngtlai leh Siaha bialtute pawhin Assembly House ah Lungleiah ngei dah a ṭulna te pawh an sawi tawh a. Hetihlai hian Lunglei khawpui chhung bial pali a MLA te hnen aṭangin Lunglei mipuite beisei leh duhthusam ṭawngkam emaw hmalakna hriat tur a awm lo a ni.
Politics a nih avanga inbeihna tur issue a ni lova, ram leh hnam thil a nih avangin Lungleia NGO te pawhin theihtawp an chhuah a, Opposition Party te pawhin Sorkar beihna hmanrua atana hmang mai lovin he thilah hian ngawih an chuh thiam hle niin a lang. Sorkar lai karna atana Opposition Party te pawhin pressure an lo siam ve a nih pawhin an tih ngei ngei tur, Lunglei leh chhim lam tana an tih tur dik tak niin a lang.
Aizawl khawpui hi Mizote tan kan Jerusalem a nih pawhin, engkim mai dah tumna avanga Aizawl khawpuiin a tawrh zawk theihna hi a tam a. Kan rilru hian chhim, hmar, chhak leh thlang a hawi a, hmasawnna pawh hi awmze nei zawka kalpui zel hi ram hruaitute hian an tih makmawh a ni. Hmasawnna a kairual loh avanga a tuartu chu kan mizopui, kan kristianpui, kan chenpuite hi an ni tih hi hre reng i la, mahni chenpuite hmasawnna pawh kan duhpui loh a, hmangaihna kan lantir thiam lo a nih chuan mahni hmasial, mahni ṭanghma chauh ngaihtuah kan ni tihna a ni ang.
Tuna Sorkarna fawng vuantute phei hi chuan Lunglei mipuite chungah hian lawmthu sawi hi a ba nasa hle a, an laka Lunglei mipuite an lo pangchang a nih pawhin a awm hle a ni.
More Stories
Permit nei lova mihring phurh