Cheng vaibelchhe 5 Saikuti Hall cheithat nan LMC in dah an remti

ZOEN 19th August 2025 : Vawiin khan Lunglei Municipal Council (LMC) Board of Councillors chu Lunglei Convention Centre-a BoC Meeting Hall-ah an thu khawm. Meeting hi Pu Lalzuithanga LMC chaimain chuan a kaihruai a, BoC thukhawm chuan State Priority Projects (SPP) hnuaia Lunglei Venglaia Tennis Court hlui hmuna ‘Green Park cum Parking’ siamna tura cheng vaibelchhe 5 hu hma lakna tur DPR ruahman chu, a hmun hma leh thil dang chin fel ngai hmabak a la tam deuh avangin leh sum a zuzi (lapse) loh nan Saikuti Hall chei that nana ruahman zawk ni se an ti. Green Park leh Parking tur chu SASCI emaw, scheme dang atang emawa ruahmanna kalpui theih dan tur ngaihtuah zel ni se, an ti.Solid Waste Management Centre-I-in a ken tel bawlhhlawh bawm sem mek chhunzawmna tur leh Garbage Free City hma lakna chhunzawm nan, Urban Local Body (ULB) Grant 2023-24 1st installment sum bang atangin in tina bawlhhlawh bawm sem tur lei ni se, an ti.
Chairman report-a a lan danin, State Priority Projects hnuaiah Lunglei khawpui tana pawimawh tur project panga, cheng vaibelchhe 17.50 hu pawmpuina hmuh tawh niin, chu’ng zingah chuan Sazaikawna LMC Complex sakna tur (Rs 4 Cr), Hrangchalkawna Transport Hub sakna tur (Rs 3.5 Cr), Ramthar AOC-a Market Shed sakna tur (Rs 2 Cr) leh C. Thuamluaia Muala Multi-Level Car Parking sakna tur (Rs 3 Cr) te a tel.
Meeting-ah hian Chairman-in a sawm angin Health Minister Pi Lalrinpuii pawhin thu sawiin, LMC hnuaia Lunglei khawpui mawina tur leh mipuite tana hma lakna hrang hrang awm chu lawmawm a tih thu a sawi a. Councillor-te chu hmasawnna atana sawrkar nawr leh um zui kawngah inthlahrung lo tur leh theih tawp chhuah zel turin a chah.
LMC Board of Councillors thut khawmah hian elected councillor 10 bakah, nominated member MLA 3 – Pi Lalrinpuii; Pu V. Malsawmtluanga leh Pu Lalramliana Papuia te pawh an tel a. LMC CEO Pu Donny Lalruatsanga leh Secretary Pi Zoramdini te’n an telpui bawk.