Sairang leh Kawnpui inkar kawng a chhiat zual leh deuh avangin Lirthei tlan khaihlak

ZOEN 19th August 2025 : Mizoram chak lakluhna kawngpui pawimawh Sairang leh Kawnpui inkar kawng a chhiat leh deuh tak avangin nimin atang khan ni 3 chhung zing dár 7 atanga tlai dár 6 thleng lirthei tlan chawlhtir leh a ni a, hei vang hian phai lam atanga bungraw phur engemawzat kawng lakah an tangkhang leh mek.

He kawng siam tur chungchanga sorkarin Single point of contact atana a ruat, Pu TBC Lalvenchhunga MLA chuan nimin khan thuchhuah siamin, kawng a chhiat leh deuh tawh avangin nimin atangin ni 3 chhung zing dár 7 atanga tlai dár 6 thleng Sairang leh Kawnpui inkar lirthei tlan chawlhtir leh tur a nih thu leh zan lamah erawh an chhuah reng tur thu a sawi a ni.

Hemi chungchanga Aksahvani Aizawl zawhna chhangin, Lirtheia Eizawng Pawl Hrang Hrang hruaitu zinga mi, MTDA President Pu H.Laldingliana chuan tlan chawlh puan a nih thu an dawng ve lo tih sawiin, lirthei te chu an intlar tawp a, a chhuah hunah an chhuak ve mai thin a ti a, kawng a tluan that a, chhum lo chat lova lirthei an tlan that chuan ni 1-ah lirthei sang 1 chuang an tlan thin laiin tunhnaiah kawng a chhiat leh tak avangin niminpiah atanga lirthei ruak chhuah tawh te pawh an ding hnem leh tawh hle a ti a, nimin zing kara kal tawh lirthei te pawh Buichali thlen hmaah tangin an la che sawn lo a ti a, Sairang peng Kawnpui lam atanga pelh thlak bakah Kawnpui atanga Mega Food Park pelh phei te chu kawng chhe zual lai a ni a ti a, zankhata lirthei tlan ten kawng chu an rap khuar nghal duk zel avangin kawng a khuar leh tawh hle niin a sawi bawk.

Sorkarin lirthei che vel a chhinchhiah danin, nizan khan Kawnpui atanga Aizawl pan bungraw phur lirthei 402 chhuah an ni a, Mualkhang/Khamrang atanga Kolasib/Assam lam panin lirthei engmah chhuah a ni lo thung a, Sairang pengah lirthei 152 leh Mualkhangah lirthei 374, avaiin lirthei 526 a tangkhang mek a ni.