Vawiin khan Mizoram sawrkara Social Welfare, Women & Child Development Minister Pi Lalrinpuii chuan Lunglei Chanmari-a Lunglei Sub-Headquarters MHIP (Mizo Hmeichhe Insuihkhawm Pawl) enkawl, vohbikte enkawlna sikul, Onyx Special School leh zirlai leh hna thawka awm hmeichhiate awmna – Girls’ Hostel tlawhin, an dinhmun a enfiah.
Social Welfare Minister Pi Lalrinpuii hi LMC Ward 4-na Councillor Pu R. Lalramzauva, Private Secretary Pu H. Lalhruaitluanga, DIPRO Pu C. Lalhruaitluanga leh party hruaitute’n an ṭawiawm a. President Dr H. Lalnunmawii hovin Sub-Headquarters MHIP hruaitute leh thawktute’n an lo dawngsawng a. Sikul leh hostel fang kualin, inkawm hona hun an hmang bawk.
Pi Lalrinpuii chuan sawrkarin vohbikte ngai pawimawhin, an hamṭhatna tur ruahmanna hrang hrang a kalpui tih sawiin, Lunglei Sub-Headquarters MHIP te’n vohbikte hmangaihna nena kum 2003 aṭang daih tawha special school an lo kalpui chu ropui a tih thu a sawi a. Sikul chu vohbikte’n nuam an tih leh an nun hlimna a nih bakah, an chhungte chhawk zangkhaina a nih avangin a hlu hle tiin, sikul leh naupangte tana mamawh an neihte chu inthlahrung lova a hnena thlen ṭhin turin a chah a. An mamawh hrang hrang sawrkar aṭanga tih theih leh CSR kal tlanga tih theih turte chu a ṭul anga a bawhzuipui tur thu sawiin, sikul mamawha a ṭul ang anga hman atan Sub-Headquarters MHIP kutah pawisa fai cheng sing khat a hlan nghal bawk.
Social Welfare Minister chuan ruihhlovin Mizoram a tichhiat nasat thu leh ngawrh taka hma lak a ṭul thu tar langin, sawrkarin Hulhliap leh ruahmanna hrang hrang kal tlangin inzirtirna, inenkawlna leh invenna lamah nasa takin hma a la tih a sawi a. MHIP te chu a theih ang anga sawrkar hma lakna thlawp a, ruihhlo dona leh a la ti lote ven himna kawngah theih tawp chhuah turin a chah.
Minister chuan sawrkarin MUHCS (Mizoram Universal Health Care Scheme) a kalpuiah April ni 1, 2025 aṭangin sawrkarin damdawi in bill kar tin a pek chhuah thu leh bill ba pakhat mah a awm loh thu sawiin, a chhawrtute an lawm thu a sawi a. Ram mipuite’n an chhawr vek theih nan August thla chu kumin atana inziah luh hun hnuhnung a nih angin la inziak lut lote inziak lut vek se an duh thu leh private hospital-te pawhin MUHCS an zawm kim thuai a beisei thu a sawi.
He hunah hian thawktute aṭangin sikul report ngaihthlak a ni a. Onyx Special School naupangte’n lam an entir bawk. Onyx Special School hi kum 2003 khan din niin, tunah hian zirlai inziak lut 33 an awm a. Naupangte phak tawka ziak leh chhiar zirtir an nih bakah, zai leh lam, kut them thiam thil zirna leh intihhlimna hrang hrang tihpui ṭhin niin, vohbikte pual programme hrang hrangah telpui ṭhin an ni a. Samagra Shiksha aṭangin chawchhun an dawng bawk.
MHIP Girls’ Hostel hi April ni 1, 2008 khan ṭan a ni a. Lungleia zirlai leh hna thawka awm hmeichhiate man tlawm zawka an awm theihna niin, seat 40 vel a awm a. Hosteller-te hian thla tin ₹3,500 chauh chawiin, admission fee a awm lo bawk a. Tun dinhmunah hosteller 18 an awm mek.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni