Land Revenue and Settlement Department chuan Online hmanga mahni ramchin entheih turin ruahmanna an kalpui mek

ZOEN 16th August 2025 : Land Revenue and Settlement Department chuan chak leh zuala hmalak an tum tih an sawi a, online hmangin mahni ram chin chiang taka en theih turin an buatsaih tih an sawi.

Land Revenue and Settlement Department Minister Pu B Lalchhanzova chuan nimin khan Serchhip DC Meeting Hall-ah chanchinbu mite a kawm a, Revenue Secretary Pu Vanlalmawia chuan tawiawmin Revenue inrelbawl dan chungchang sawi langin, tunlai thiamna hman tangkai an tum dan leh hma an lak mek dan te, chhiah pawh e-ram hmangin online a pek theih a nih thu te, digital land record an kalpui mekah GIS Mapping tih niin online in mahni ram chin chiang taka en theih a nih thuai tur thute a sawi. Secretary chuan Revenue Court System mumal awm lo pawh siam that tumin hma an la a, Revenue Court Manual siam mek a ni tiin, ram buai chungchangah DC leh ADC te chu first appellate atan ruat an tum thu te a sawi bawk.

Minister tawiawmtu Supply Secretary Pi Teresy Vanlalhruaii pawhin Supply chungchanga an hmachhawp sawiin, ruahmanna fel tak siama mipuiin an nitin mamawh a hun tak leh dik taka an dawn theih nan hma an lak thu a sawi a. Retailer te hnenah buk dik taka buhfai leh a dangte an pe chhuak ngei tih hriat nan Supply Kudam tinah digital weighing scale dah a ni dawn a, August thla chhung hian khawl a lo thlen kim beisei a ni, a ti.
Supply Secretary chuan, sawrkar laipui duh dan angin Beneficiary zawng zawngte e-kyc tih fel vek tur a ni tih Supply Secretary chuan sawiin khaw tina VC te tanpui turin a sawm a, September ni 30 thleng chauh hun an neih tawh avang leh e-kyc tifel lo ten ration an dawn theih dawn loh avangin tan la turin a ngen a ni. Online-a ration card dilna siam an tum thu te, mipuiin thla tira ration an dawn theihna tura tan an lak dan te, Supply Minister hmalakna avanga kawng chhe karah pawh buhfai harsat thu hriat tur a awm loh thu te a sawi bawk.