ZPM leh MNF ten Candidate an puang chu thil mak leh chhiat tawk chhungte leh bial mipui tawrhpuina aiin palzutna a ni- MPCC President

ZOEN 6th Sept. 2025 : Pu Lal Thanzara, Mizoram Pradesh Congress Committee President chuan Dampa bial Bye- Election neih a nih tur a hun puan a nih hma leh bialtu MLA Pu Lalrintluanga Sailo boral sarhu laia ZPM leh MNF ten Candidate an puang chu thil mak leh chhiat tawk chhungte leh bial mipui tawrhpuina aiin palzutna a ni, a ti.
Pu Lal Thanzara chuan Congress Bhavan-ah nimin khan thusawiin, Dampa bialah Congress party-ah beiseina mipuiin an nei nasa a. Dampa bialah Congress party in hnehna an chang a nih chuan kum 2028 MLA inthlan atan Campaign a chanve an zo tluk tihna a ni a ti a. Nakum Aizawl Municipal Corporation inthlan hun atan an inpeih tawh bakah kum 2028 inthlanpui neih tur atan Final khel turin an in pet kai mek tawh a ti bawk. Chumi tichiangtu chu Congress Party in programme kan hman apiangin mithar lawmluh tur kan nei zel hian a tichiang a ni, a ti.
Pu Lal Thanzara chuan, Aizawl West-I huam chhungah Local Council mumal taka hmalakna nei hlei thei lo khawpin ZPM party in boruak an siam ni a sawiin a thlangtu mipui zah lohna leh ram tana thil tha an duh loh zia tichiangtu a ni a ti a. ZPM chu tel ve na an neih miah lohna hmunah pawh tel ve anga in sawi thin, enchhin sorkar ZPM tluka Mizorama rorelna chelh tawh Party zingah term chanve pawh an hman hmaa mipui nin hlawh an la awm lo a ti a ni.
ZPM chu Sum leh paiah an harsa em em nia sawiin, sum hmuhna a nih beiseiin Mizoram mipui pawmpui miah loh FCAA an pass a ti a ni.