ZOEN 2nd Sept. 2025 : Vawiin khan Lunglei District AIDS Prevention & Control Committee (DAPCC) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm a. Lunglei District-a HIV chungchang inzirtirna leh thisen endik runpui, Intensified IEC Campaign cum HIV Test Drive Campaign kalpui dan tur an rel.
Mizoram State AIDS Control Society (MSACS) bul tuma hma lakna pawimawh tak, Intensified IEC Campaign cum HIV Test Drive Campaign 2025 District tina kalpui tur chu DAPCC ṭhu khawm hian Lunglei District-a he hma lakna kalpui dan tur hi sawi hovin, ruahmanna hrang hrang an siam a ni.
Lunglei District bika he campaign hawnna hi September ni 11, 2025-ah Lunglei Convention Centre-a buatsaih turin ruahman a ni a. He campaign hi thla khat chhung kalpui tum niin, Lunglei District-a thingtlang khaw thlan bikah kalpui tura ruahman a ni.
He campaign kalpui chhung hian HIV/AIDS leh mipat hmeichhiatna (sex) aṭanga natna inkai chhawn theih chungchang inzirtirna leh thisen endikna (HIV test) kalpui a ni dawn a. Zirna inahte inzirtirna (awareness programme) buatsaih tum niin, Lungleia MSACS staff-te leh VC leh YMA te nen ṭang kawpin thingtlang khaw tam zawkah he campaign hi kalpui tura ruahmanna siam a ni.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni