Forensic Vehicle 10 chu Home Minister Pu K. Sapdanga’n a vailiam

ZOEN 2nd Sept. 2025 : Nimin khan sorkar laipuiin cheng vbc 4 chuang senga a lei Mobile Forensic Vehicle 10 chu Home Minister Pu K. Sapdanga’n a vailiam

Nikum July ni 1 atanga ram puma hman tan tak Criminal Law thar Bharatiya Nagarik Suraksha Sanhita, (BNSS) 2023 chuan Forensic lam hnuchhuina a dah pawimawh hle a. Dan tharah kum 7 chin chunglam hrem theihna reng reng eng pawi khawihnaah pawh Forensic expert in a endik a ngai a ti a. Forensic lamin an tih tur a hun taka an tih chat chat theih nan Sorkar laipui chuan State/UT tin FSL tih changtlunna turin khawl pawimawh leina tur leh pawikhawihna hmun thlen zung zung theihna tur Mobile Forensic Vehicle (MFV) leina tur sum a ruahman sak a. Mizoram FSL pawh khawl pawimawh 15 leina tur cheng vbc 6 leh nuai 13 leh Mobile Forensic Vehicle 10 leina tur a rawn pe a ni.

Tun dinhmunah hian Directorate of Forensic Science Laboratory, Mizoram New Capital Complex hnuaiah District Mobile Forensic Unit, Aizawl, Lunglei leh Champhaiah hawn a ni a, thawktu tur mithiamte pawh lak thuai an ni ang a, district dangah pawh hawn belh zel tura hmalak a ni ang.

Home Minister chuan he hunah hian thusawiin Mizoram Forensic Science Lalboratory chuan India ramah hmahruaina neiin, case exam chhung rei lo ber, paperless a kal hmasa ber leh case tracking system nei hmasa ber a ni mek a ti a, chhuanawm a tih thu a sawi a ni.

Tunah hian Director Pu T. Lalropuia hovin expert 14 an awm mek a. Anni hian pawikhawihna a awmin Mizoram hmun hrang hrangah an kal thin a, laboratory ah an exam leh a, law court ah expert testimony pein an tul hle. Mizorama case lian tam takah Mizoram Police te nen thawk hovin rorelna dik a thlen theihna turin theihtawp an chhuah rah tam tak kan hmu tawh a ni.