ZOEN 29th August 2025 : India sorkar chuan Online Gaming Act 2025 a hmang tawh dawn a, he Dan hnuaiah hian pawisa tak tak hmanga game/ gambling khelh theihna te chu khap leh tihtawp mek an ni a, game thenkhat erawh chu mamawh dan anga siamrem leh hman tangkai an ni thung dawn a, sorkar gazette nghah mek chauh a ni tawh tih Pu Rony Lallianmawia, Sr. Informatics Officer, Information n Communication Technolgy (ICT) Dept chuan a sawi.
Heng games khap zinga a lar zual te chu sum tam tham tak inthleng kualna Rummy te, Poker, Fantasy, Lottery leh a dangte an ni a, chutih lai chuan Sorkar laipui chuan e-sport online gaming dang entirnan educational and social games te chu thalai tam tak tan hman tangkai a nih theih nan tihlar a tum thung dawn a, Research & Training Centre te pawh sorkar chuan a din dawn thu a sawi.
Hetih lai hian PUBG, DoTA, FIFA, Mobile Legends leh a dang te Mizo thalai te pawn an lawm em em te chu khap zingah an tel lova, heng hi midangte bum nan hmang lova, awmze nei tak leh dan ang taka eizawnnan erawh a hman theih avangin Mizo thalai ten fimkhur tak chungin khel se a duh thu a sawi bawk a ni. Hetihlai hian Mizoram Cyber Crime Police te chuan PUBG leh Mobile Legends atang te hian inbumna kan state ah a hluar chho nasa an ti a, nitin thubuai an ziahluh thu an sawi. Tunhnaiah naupang lehzual zingah pawh heng games khel thin te hian an chhungte GPay leh bank account atangin pawisa tam tak an lo hman ruk sak thin thu Cyber Crime Police te chuan an sawi a, fimkhur turin mitin an chah nghal.
More Stories
Lunglei ah World Rabies Day hman a ni
Mizoram hmung hrang hranga Sazu puang chuan Scrub typhus natna a pu darh nasa tih finfiah a ni a
GST 2.0 Kalpui hnua rate thar hmang lo mi engemawzat pawisa chawi tir an ni