Christian Hospital Serkawn-in damlo 786 te inenkawlna senso cheng nuai 151.75 MUCHS atangin hmu let tawh

ZOEN 16th August 2025 : Vawiin khan Home Minister Pu K. Sapdanga chuan Christian Hospital Serkawn  tlawhin MUCHS Review Committee dinah Chairman-a ruat a nih angin MUHCS-a siam rem leh en nawn ngaite lo zir chiang tura damdawi in chu tlawh a nih thu a sawi. Christian Hospital Serkawn chu MUHCS timawitu leh tiphuisuitu hmasa ber, phur tak leh inhawng taka sawrkar thawhpuitu an nih angin an ngaihlu tak zet tih sawiin, BCM Kohhran leh damdawiin leh thawktute chungah sawrkarin lawm thu a sawi a ni, a ti.

Christian Hospital Serkawn hotute pawhin MUHCS hnuaia an damdawi in in bill an neihte chu Mizoram sawrkarin rial rei lova chawlhkar tin a pek chhuah zung zung thu leh pawisa an dawn that thu sawiin, sawrkar chungah an lawm hle tih an sawi a,

Medical & Health Department Director Dr B. Laldinliana chuan Christian Hospital Serkawn chuan May ni 21, 2025 khan MUHCS hmang tanin, damlo 786 te inenkawlna senso cheng nuai 151.75 chu Mizoram sawrkar atangin an hmu let tawh a. Kar tin chawh rualin cheng nuai 13.2 vel hmu ang an nih thu a tarlang bawk a ni. UD&PA Department kal tlanga Christian Hospital Serkawna damlo awmpuitute riahna tur, ‘Patient Attendants Shelter’ – mipa 5 leh hmeichhe 5 thlen theihna tur sa tura ruahman chu buaipui mek a nih thu leh fur zawh veleh hna tan theih beisei a nih thu tar lan a ni bawk.

Home Minister Pu K. Sapdanga hian vawiin khan Mizoram Presbyterian Kohhran enkawl John Williams Hospital pawh tlawhin Medical Superintendent Dr K. Lalsanga hovin damdawi ina thawktute’n lo dawngsawngin, damdawi in an lo fan kualpui bakah, an hma lakna te an lo hrilh. Minister chuan sawrkarin hma lakna hrang hrang a neihah kohhran leh mimal damdawi inte’n sawrkar an thlawpna leh thawhpuina a that thu a sawi a. John Williams Hospital-a thawktute chu tha taka sawrkar thawhpui zel tur leh mipui hrisel nan theih tawp chhuah chhunzawm zel tura chahin, duhsakna a hlan.