Raltlan Biometric Enrolment 1947 tih tawh a ni

ZOEN 11th August 2025 : Raltlante kutzia leh mit-naute lakkhawm hna Mizoram district 11-a kalpui mekah Zirtawpni tlai thleng khan Myanmar raltlan 1,947 biometric enrolment tih tawh a ni.
Home department chuan Myanmar raltlan 32,000 chuang leh Bangladesh raltlan 3,000 tling lo deuhte mit-naute leh kutze lakkhawm hna chu July ni 28 atanga bul tan an awm laiin a nawlpui chuan July ni 30 leh 31-ah an tan a, July thla tawp lamah bul an tan hman vek a ni. Chutih lai-in district hrang hranga he hna thawktute hian harsatna an tawk a. A bik takin biometric enrolment hnathawhna electronic khawl hman hleih theih loh a awm nual a, chu bakah internet signal dawn that tawk lohna hmunah harsatna an tawk bawk. Relief camp-a a huhova awmte mit-naute leh kutze thla lak a awlsam viau lai-in an fate Aizawl leh district danga lehkhazir mekte an awm avangin lak kim vek hleih theih loh a awm a. An chhungte leh thiante belte leh mi inluahte chu an awmna hmun a inkar-ki avangin hna a kal chak thei lo bawk a ni.

Myanmar raltlan awm tam berna Champhai district-ah hian mi 13,500 chuang an awma ngaih a ni a. Chuti chung chuan Champhai district official-te electronic khawl hman hi a fuh theih loh avangin Inrinni khan Aizawl atangin khawl thar an la leh a. Tun kar chho hi chuan an thawk tluang thei tura an inngaih thu an sawi a. July ni 31 atang khan an hna tan tawh mah se, mi 7 chauh biometric enrolment an la ti thei a ni.
Myanmar raltlante hi district 11-a an awm lai-in Bangladesh Chittagong Hill Tract atanga raltlante hi district pathumah chauh an awm a. Lawngtlai district-ah mi 2,000 chuang an awm a, Thenzawl khawpui-ah 266 awmin Lunglei district a Khawmawi khua-ah 63 an awm bawk a ni.
Tun dinhmunah hian Mizoramah Myanmar raltlan hi mi 32,504 an awm mek ni a chhinchhiah a ni a. Champhai district-ah tam berin, Lawngtlai district leh Siaha district te’n an dawt a ni.