Ni 2 Awh Mizoram Legislative Assembly Session vawiin khan zawh a ni

 

Speaker Pu Lalbiakzama kaihhruaia ni 2 awh Assembly fur thutkhawmah ah hian, star question 350 lut zingah zawhna 342 pawm a ni a, House ah zawhna 5 chhan niin chhan hmanloh 35 a awm a ni. Unstarred question ah zawhna 105 lutin zawhna 97 admit ani.

 

House dawhkanah report 19 dah niin official Resolution pakhat – Mizorama Forest (Conservation) Amendment Act hmanna tur put luh chu House in lungrual takin a pawm a, lehkha pawimawh 13 pharh a ni a, Government Bill 4 lut te pass vek a ni bawk. Bill pass tak te hi, Minister Pu K. Sapdanga’n a put luh – The Mizoram Local Bodies Ombudsman Bill, 2025 : Minister Pu Lalghinglova Hmar bill put luh – The Mizoram Private Placement Agencies (Regulation) (Amendment) Bill, 2025. Minister Pi Lalrinpuii putluh Mizoram Prohibiton of Beggary Bill leh Mizoram (Land Revenue) (Amendment) Bill, 2025 te pass a ni.

 

Speaker Pu Lalbiakzama chuan session zawhna te chhang hma thin turin Dept official te a chah a, tun hi vawi 3 sawina leh house kaltlanga ngenna siam tum 3-na a ni a ti.

 

Opposition Leader Pu Lalchhandama Ralte chuan sessiona an tih tur list of business chu a hma zan dar 12 ah pawh an la hmu thei lo thin tih sawiin hei hi ngaihmawhawm a tih thu leh Chief Secy kaltlanga a chhang tlai thin dept te pawh zilhhau hial a ngai dawn a ni a ti a, hetiang hian house a ti bawrhbang thei a ni a ti.